मराठा आरक्षणासाठी जरांगे पाटील यांची नवी रणनीती; नेमकं काय ठरवलं?

मराठा आरक्षणासाठी संघर्ष करणारे मनोज जरांगे पाटील यांनी आपल्या आंदोलनाची पुढील दिशा स्पष्ट केली आहे. त्यांनी अंतरवाली सराटी येथील आंदोलन स्थगित केल्याचे जाहीर करत, आता ही लढाई रस्त्यावर पाटोद्यापर्यंत पोहोचल्याचे नमूद केले. “आमची लढाई सुरूच आहे,” असे जरांगे पाटील यांनी म्हटले. अंतरवाली सराटीतील आंदोलन हे शेवटचे होते, असे त्यांनी स्पष्ट केले. यापूर्वीच पहिल्या दिवशी ही माहिती देण्यात आली होती. अंतरवाली सराटी गावातील गोरगरीब जनतेने तीन वर्षे संघर्ष केला, रक्त सांडले आणि अनेक हालअपेष्टा सोसल्या.

काही ओबीसी बांधवांनीही या लढ्यासाठी जमिनी दिल्या, त्याबद्दल जरांगे पाटील यांनी गावकरी आणि दखणेवाडीतील लोकांचे मनापासून आभार मानले. आता पाटोद्यापर्यंत पोहोचल्याने मागे वळण्याचा प्रश्नच उद्भवत नाही, असे जरांगे पाटील यांनी सांगितले. पुढील तीन महिन्यांत मराठा आरक्षण मिळाले नाही, तर पाटोद्यापासून मुंबईपर्यंत आंदोलन तीव्र केले जाईल, असा इशारा त्यांनी दिला. मराठा समाजासाठी अंतरवालीचे योगदान विसरले जाणार नाही, अशी भावना त्यांनी व्यक्त केली. तसेच, यंदाचा दसरा मेळावा नारायण गडावरच होणार असल्याची माहितीही त्यांनी दिली.