NCP Meeting Update : राष्ट्रवादीच्या आमदारांची सुनेत्रा पवारांसमोर नाराजी; शिंदेंच्या खात्यांबाबत उपस्थित केले प्रश्न
राष्ट्रवादीच्या आमदारांनी देवगिरीवरील बैठकीत शिंदे सरकारविरोधात तक्रार केली. अर्थखात्याबाबतही विचारणा करत आमदारांनी कामांच्या पूर्ततेत अडचणी येत असल्याचे सांगितले. वरिष्ठांमधील संघर्षामुळे पक्ष कमजोर होत असून, निधीअभावी मतदारसंघात कामे होत नसल्याची भीतीही व्यक्त केली.
राष्ट्रवादी काँग्रेसच्या आमदारांनी देवगिरी बंगल्यावर झालेल्या बैठकीत उपमुख्यमंत्री एकनाथ शिंदे यांच्या नेतृत्वाखालील सरकारविरोधात तीव्र नाराजी व्यक्त केली आहे. सूत्रांकडून मिळालेल्या माहितीनुसार, आमदारांनी शिंदे यांच्याकडील खात्यांमध्ये तसेच शिंदे यांच्या मंत्र्यांकडून कामे मार्गी लागत नसल्याची तक्रार केली. विशेषतः अर्थ खात्याबाबतही या बैठकीत आमदारांकडून विचारणा करण्यात आली.
या बैठकीचे आयोजन सुनेत्रा पवार यांनी केले होते, जिथे अजित पवार यांच्या नेतृत्वाखालील राष्ट्रवादीचे आमदार उपस्थित होते. वरिष्ठांमधील संघर्षाचा पक्षावर नकारात्मक परिणाम होत असून, पक्ष कमजोर होत असल्याची भावना आमदारांनी व्यक्त केली. कामे मार्गी लागत नसल्याने मतदारसंघात मतदारांना उत्तर देणे कठीण होत असल्याचे आमदारांनी सांगितले. निधी न मिळाल्यास निवडणुकीत पराभवाला सामोरे जावे लागू शकते, अशी भीती नाशिकमधील एका आमदाराने सुनेत्रा पवार यांच्यासमोर बोलून दाखवली.
मकरंद पाटील यांनी भाजपच्या वाढत्या दादागिरीबाबत चिंता व्यक्त केली, तर आमदार सरोज अहिरे यांनी कुंभमेळ्याच्या कामात भाजपने डावलल्याची तक्रार केली. आमदारांनी आपल्या मतदारसंघांसाठी अधिक निधी मिळावा अशी मागणी केली असून, दादांच्या नेतृत्वाखाली सरकारमध्ये सहभागी झाल्यावर वित्त आणि नियोजन विभाग राष्ट्रवादी काँग्रेसकडे होता, त्यामुळे तो पुन्हा पक्षाला मिळावा अशी भूमिका या बैठकीत घेण्यात आली.
