मुंबई-गोवा महामार्गाच्या उद्घाटनाला यायला लाज वाटतेय, कारण… नितीन गडकरींचं पुन्हा मोठं विधान

मुंबई-गोवा महामार्गाच्या कामाला सोळा ते सतरा वर्षे लागल्याबद्दल केंद्रीय मंत्री नितीन गडकरी यांनी तीव्र नाराजी आणि संताप व्यक्त केला आहे. या प्रकल्पाला झालेल्या विलंबामुळे आपल्याला लाज वाटते आणि त्यामुळे महामार्गाच्या उद्घाटनाला उपस्थित राहणार नसल्याचे गडकरी यांनी जाहीर केले. या दिरंगाईसाठी त्यांनी कंत्राटदार आणि अधिकाऱ्यांना जबाबदार धरले आहे. गडकरींनी सांगितले की, त्यांच्या मंत्रालयाने यापूर्वी सात जागतिक विक्रम केले आहेत.

परंतु, मुंबई-गोवा महामार्गाचे काम पूर्ण होण्यास एवढा विलंब लागल्याने त्यांनी आता एक नवीन जागतिक विक्रम करण्याचा निर्धार केला आहे. वर्षभरात जास्तीत जास्त कंत्राटदारांना ब्लॅकलिस्ट करून त्यांना कामातून डिबार करणे, तसेच दोषी अधिकाऱ्यांना निलंबित करणे हे आपले लक्ष्य असल्याचे त्यांनी स्पष्ट केले. यापुढे कोणतीही मुरवत ठेवली जाणार नाही, असा इशाराही त्यांनी दिला. गडकरींचे हे वक्तव्य महाराष्ट्रातील मुंबई-गोवा महामार्गाच्या स्थितीबद्दल असून, गोव्यातील परिस्थिती यापेक्षा वेगळी असल्याचेही त्यांनी नमूद केले.