Pandharpur Vitthal Temple : पाडव्याच्या शुभमुहूर्तावर विठ्ठल-रुक्मिणी मंदिर फुलांनी सजलं; तब्बल २ टन फुलांची आकर्षक सजावट, दर्शनासाठी भाविकांची अलोट गर्दी
दिवाळी पाडव्यानिमित्त पंढरपूर येथील विठ्ठल-रुक्मिणी मंदिर देशी-विदेशी फुलांनी मनमोहकपणे सजले आहे. रहाटा आणि देविदास नखाते यांच्या सेवाभावातून दोन टन रंगीबेरंगी फुलांचा वापर करून गाभारा, सोळा खांबी आणि चार खांबी मंदिराचे विविध भाग आकर्षक बनवले आहेत. पाडव्यामुळे पहाटेपासूनच भाविकांनी दर्शनासाठी मोठी गर्दी केली आहे.
दिवाळी पाडव्याच्या शुभमुहूर्तावर पंढरपूर येथील जगप्रसिद्ध विठ्ठल-रुक्मिणी मंदिर फुलांच्या आकर्षक सजावटीने उजळून निघाले आहे. या विशेष सजावटीसाठी तब्बल दोन टन देशी आणि विदेशी रंगीबेरंगी फुलांचा वापर करण्यात आला आहे. मंदिरात भक्तिमय आणि प्रसन्न वातावरण निर्माण झाले आहे.
रहाटा आणि स्थानिक विठ्ठल भक्त देविदास नखाते यांच्याकडून ही सुंदर फुलांची सजावट सेवा म्हणून अर्पण करण्यात आली आहे. विठ्ठलाचा गाभारा, रुक्मिणी मातेचा गाभारा, सोळा खांबी तसेच चार खांबी मंदिराच्या विविध भागांना ही आकर्षक सजावट करण्यात आली आहे. यामध्ये गुलाब, शेवंती, ऑर्किड अशा जवळपास २० ते २५ प्रकारच्या विविध फुलांचा समावेश आहे, ज्यामुळे मंदिराचे सौंदर्य अधिकच खुलले आहे.
पाडव्यानिमित्त भाविकांनी पहाटेपासूनच विठ्ठल दर्शनासाठी मोठी गर्दी केली आहे. दर्शनाने आपल्या दिवसाची आणि नववर्षाची सुरुवात करण्याची प्रथा असल्याने मोठ्या संख्येने भाविक विठ्ठल मंदिरात दाखल झाले आहेत. फुलांच्या या मनमोहक सजावटीमुळे देवाचे रूप अधिकच मोहक आणि तेजस्वी दिसत आहे, असे भाविक अनुभवत आहेत.
