Dancer Radha Patil News | पुण्यात दहीहंडीतील लावणी भोवली! नृत्यांगणा राधा पाटीलसह आयोजकांवर गुन्हा दाखल

पुण्यात नृत्यांगणा राधा पाटील आणि दहीहंडी कार्यक्रमाच्या आयोजकांवर बिबवेवाडी पोलिसांनी गुन्हा दाखल केला आहे. परवानगी नसताना दहीहंडी कार्यक्रमात लावणी सादर केल्याप्रकरणी ही कारवाई करण्यात आली आहे. तसेच, कार्यक्रमासाठी प्रयोग परिनिरीक्षण मंडळाचे आवश्यक प्रमाणपत्र सादर न केल्यानेही हा गुन्हा नोंदवण्यात आला आहे.

मिळालेल्या माहितीनुसार, पुणे शहरात आयोजित केलेल्या एका दहीहंडी कार्यक्रमात नृत्यांगणा राधा पाटीलने लावणी सादर केली होती. मात्र, या कार्यक्रमासाठी संबंधित आयोजकांनी कोणतीही रीतसर परवानगी घेतली नव्हती. सार्वजनिक कार्यक्रमांसाठी आवश्यक असलेल्या प्रशासकीय परवानग्या आणि सांस्कृतिक कार्यक्रमांसाठी लागणारे प्रयोग परिनिरीक्षण मंडळाचे प्रमाणपत्र सादर करण्यात आयोजक अपयशी ठरले. या नियमभंगामुळे बिबवेवाडी पोलिसांनी नृत्यांगणा राधा पाटीलसह मंडळाच्या आयोजकांवर कायदेशीर कारवाई केली आहे. या घटनेमुळे सार्वजनिक कार्यक्रमांच्या आयोजनातील नियमांचे पालन करण्याचे महत्त्व पुन्हा एकदा अधोरेखित झाले आहे. या प्रकरणाचा पुढील तपास बिबवेवाडी पोलीस करत आहेत.