Pune Politics : काय करतो गेलो तुझ्या वाकड्यात…अजितदादांचा ऐकेरी उल्लेख अन् BJP आमदाराचं थेट खुलं चॅलेंज
पुणे आणि पिंपरी चिंचवडमध्ये अजित पवार आणि भाजप आमदार महेश लांडगे यांच्यात गुंडगिरी आणि भ्रष्टाचारावरून तीव्र संघर्ष सुरू आहे. अजित पवारांनी गुंडगिरी मोडून काढण्याचा इशारा दिला, तर लांडगेंनी आम्ही वाकड्यात गेलो, काय करणार ते बघू असे आव्हान दिले. ७० हजार कोटींच्या सिंचन घोटाळ्याच्या आरोपावरूनही राजकारण तापले आहे.
पुणे आणि पिंपरी चिंचवडमध्ये राष्ट्रवादी काँग्रेसचे नेते अजित पवार आणि भाजपचे आमदार महेश लांडगे यांच्यातील राजकीय वाद टोकाला पोहोचला आहे. दोघांनीही एकमेकांवर गंभीर आरोप केले आहेत. अजित पवारांनी स्थानिक राजकारणातील गुंडगिरी मोडून काढण्याचा इशारा दिला, “कुणी कितीही मोठा असला तरी गुंडगिरी मोडून काढतो, माझ्या नादाला कुणी लागलं तर सोडत नाही,” असे त्यांनी म्हटले. याला प्रत्युत्तर देताना महेश लांडगे यांनी, “गेलो आम्ही वाकड्यात, आता बघू काय करायचंय ते,” असे आव्हान दिले. लांडगे यांनी अजित पवारांवर ७० हजार कोटींच्या सिंचन घोटाळ्याचे आरोप केले. या घोटाळ्यातून वाचण्यासाठीच पवार भाजपसोबत आल्याचे त्यांनी म्हटले. याउलट, अजित पवारांनी भाजपला महापालिकेच्या कारभारावरून भ्रष्टाचारी आणि राक्षसी भूक असलेले म्हटले आहे. राज्य पातळीवर भाजप आणि अजित पवारांची राष्ट्रवादी काँग्रेस सत्तेत भागीदार असली तरी, पुणे आणि पिंपरी चिंचवड महापालिका निवडणुकीच्या पार्श्वभूमीवर हे दोन्ही पक्ष स्वतंत्रपणे लढत आहेत, ज्यामुळे स्थानिक पातळीवर कटुता वाढत आहे.
