Raj Thackeray : महाराष्ट्राला ज्याची प्रतिक्षा त्या मनसे अन् शिवसेनेची युती… राज ठाकरेंकडून ऐतिहासिक घोषणा अन् मुंबई महापौर पदावरून मोठा दावा

महाराष्ट्र नवनिर्माण सेना (मनसे) आणि शिवसेनेने (उद्धव बाळासाहेब ठाकरे गट) अधिकृतपणे युतीची घोषणा केली आहे. मनसे अध्यक्ष राज ठाकरे यांनी याची माहिती देताना सांगितले की, कुठल्याही वादापेक्षा आणि भांडणापेक्षा महाराष्ट्र मोठा आहे या विचारातून ही एकत्र येण्याची सुरुवात झाली. ही युती आगामी स्थानिक स्वराज्य संस्थांच्या निवडणुकांसाठी महत्त्वाची मानली जात आहे, ज्यामध्ये मुंबई महानगरपालिकेच्या निवडणुका देखील समाविष्ट आहेत. युतीमधील जागावाटपाचे आकडे किंवा तपशील सध्या जाहीर करण्यात आले नाहीत. राज ठाकरे यांनी स्पष्ट केले की, आकड्यांचा खेळ सध्या महत्त्वाचा नाही. ही युती केवळ मुंबईपुरती मर्यादित नसून, महाराष्ट्रातील इतर महानगरपालिकांमध्येही तिचे पडसाद उमटतील असे संकेत देण्यात आले. भाजप नेते रावसाहेब दानवे यांच्या उद्धव ठाकरे यांच्यावरील टीकेला राज ठाकरेंनी प्रत्युत्तर देत, मुंबईचा महापौर मराठीच होणार आणि तो आमचाच होणार असा निर्धार व्यक्त केला.