सर्वात मोठी अपडेट! खारातच्या जमिनीत पार्टनरशिप… चाकणकरांचा पलटवार, सगळ्यांना कोर्टात ओढलं

राज्य महिला आयोगाच्या माजी अध्यक्षा राहिलेल्या रुपाली चाकणकर सध्या चांगल्याच अडचणीत सापडल्या आहेत. नाशिकमधील भोंदू अशोक खरातसोबतचे फोटो व्हायरल झाल्यानंतर आधी रुपाली चाकणकरांना त्यांच्या पदावरून पाय उतरावा लागला. इतकेच नाही तर त्यांना एसआयटी चौकशीलाही सामोरे जावे लागले होते.

चाकणकर म्हणाल्या, “माझे कुटुंब वारकरी संप्रदायाचे असून, मी अशोक खरात आणि त्याच्या पत्नीला आध्यात्मिक श्रद्धेपोटी गुरू मानले होते,” असं रुपाली चाकणकर एसआयटीसमोर म्हणाल्या. “माझे आणि अशोक खरातचे आर्थिक संबंध नसून खरातकडे जाण्यासाठी मी कोणत्याही महिलेला आग्रह केला नाही,” असं रुपाली चाकणकरांनी सांगितले. तसेच “अशोक खरात याची दुसरी बाजू मला माहीत नव्हती,” असा दावाही रुपाली चाकणकरांनी केला.

अलीकडेच चाकणकरांचा व्हिडीओ समोर आला आहे. त्यांनी यामध्ये खरातशी कुठेही संबंध नसल्याचे सांगितले. AI चा आणि खोट्या माहितीचा वापर करून त्यांना फसवण्यात आले, असेही त्यांनी सांगितले आहे. इतकेच नाही तर जमिनीच्या व्यवहार प्रकरणी कोणतीच माहिती नसून मी पार्टनर नव्हतेच, असे चाकणकर म्हणाल्या आहेत. ही माहिती दिल्यानंतर चाकणकरानी आणखी एक महत्त्वाची माहिती दिली, त्या म्हणाल्या, “माझ्यावर आशा मिरगे (महिला आयोग सदस्या) यांच्यासह अनेकांनी संधी साधून चिखलफेक केली. या सर्वांना कालच नोटीस आली आहे. दिल्ली हायकोर्टात या सगळ्यांना उपस्थित राहावे लागणार आहे, तिथे मी देखील असेन.”