शेतकऱ्यांवरील वक्तव्याने वाद, संजय गायकवाडांचा यू-टर्न; म्हणाले, ‘ते विधान तरुणांसाठी होतं!’

शिवसेनेचे आमदार संजय गायकवाड यांनी शेतकऱ्यांबाबत केलेल्या वादग्रस्त वक्तव्यामुळे राजकीय वर्तुळात मोठी खळबळ उडाली आहे. शेतकऱ्यांच्या अंत्यसंस्कारालाही कोणी जाऊ नये, असे विधान गायकवाड यांनी केले होते. या वक्तव्यामुळे मित्रपक्षांच्या नेत्यांकडूनही त्यांच्यावर टीका होऊ लागली. राष्ट्रवादी काँग्रेसचे नेते हसन मुश्रीफ यांनी तात्काळ गायकवाडांनी शेतकऱ्यांची माफी मागावी, अशी मागणी केली.

टीका वाढत असल्याचे पाहून आमदार गायकवाड यांनी आपल्या वक्तव्यावरून यू-टर्न घेतला. त्यांचे स्पष्टीकरण देताना त्यांनी म्हटले की, त्यांचे हे वक्तव्य शेतकऱ्यांबद्दल नव्हते. तर, आपल्या परिसरात अमली पदार्थांचे सेवन करून टोकाचे पाऊल उचलणाऱ्या तरुणांसंदर्भात होते. गांजा, दारू किंवा बॉन्ड यांसारख्या अमली पदार्थांच्या नशेत काही तरुण बेभान होतात आणि आपले जीवन संपवतात, अशा तरुणांना उद्देशून आपण हे विधान केले होते, असे गायकवाड यांनी स्पष्ट केले.