BMC Election 2025: पालिका निवडणुका जाहीर होताच राऊत राज ठाकरे यांच्या भेटीला, ‘शिवतीर्थ’वर खलबतं, घडतंय काय?

महाराष्ट्र राज्य निवडणूक आयोगाने महापालिका निवडणुकांचा कार्यक्रम जाहीर केल्यानंतर, खासदार संजय राऊत आणि ठाकरे शिवसेनेचे नेते अनिल परब यांनी मनसे अध्यक्ष राज ठाकरे यांची शिवतीर्थ निवासस्थानी भेट घेतली. ही भेट आगामी महापालिका निवडणुकीतील ठाकरे बंधूंच्या संभाव्य युतीसंदर्भात अत्यंत महत्त्वाची मानली जात आहे. राऊत यांनी सकाळी पत्रकार परिषद घेऊन राज ठाकरे यांची भेट घेणार असल्याचे सांगितले होते. गेल्या अनेक महिन्यांपासून दोन्ही ठाकरे बंधू मुंबईसह आसपासच्या महानगरपालिका निवडणुका एकत्रित लढतील अशी चर्चा सुरू होती. ही युती अधिकृतपणे जाहीर होण्यापूर्वीची ही भेट असल्याचे मानले जात आहे. येत्या दोन ते तीन दिवसांत युतीची घोषणा होण्याची शक्यता सूत्रांनी वर्तवली आहे. जागावाटपावर अंतिम टप्प्यात चर्चा सुरू असून, युतीची घोषणा कशी करायची, यावरही विचारमंथन सुरू आहे.