पाकिस्तानचा रोज उदोउदो करता, तिथलाच सर्वोच्च पुरस्कार मिळायला हवा! नवनाथ बन यांचा संजय राऊतांना टोला

उपमुख्यमंत्री एकनाथ शिंदे यांना लंडनमध्ये मिळालेल्या पुरस्कारावरून महाराष्ट्राच्या राजकारणात सध्या जोरदार चर्चा सुरू आहे. शिवसेनेचे (उद्धव बाळासाहेब ठाकरे) खासदार संजय राऊत यांनी या पुरस्कारावर टीका करत तो खासगी संस्थेने दिलेला सन्मान असल्याचे म्हटले आहे. संजय राऊत यांच्या मते, अशा खासगी संस्थांकडून ‘संसद रत्न’ सारखे अनेक पुरस्कार दिले जातात, जे त्यांनी स्वतः कधीही स्वीकारले नाहीत. ते म्हणाले की, या देशामध्ये अनेक संसद रत्न आहेत ज्यांनी संसदेत कधी तोंडही उघडले नाही.

राऊत यांनी एकनाथ शिंदे यांच्या लंडन भेटीवरही टिप्पणी केली. लंडनमध्ये पुरस्कार स्वीकारण्यासाठी किंवा विरंगुळा आणि हवापालट करण्यासाठी शिंदे दरे गावातून (जिथे हवा सध्या गरम आहे) तिकडे गेले असतील, असे राऊत सूचकपणे म्हणाले.

या टीकेला बान यांनी प्रत्युत्तर दिले आहे. बान यांनी राऊतांना टोला लगावत म्हटले आहे की, एकनाथ शिंदे यांना लंडनमध्ये पुरस्कार मिळतो, पण संजय राऊतांना पाकिस्तान किंवा बांगलादेशमध्येही पुरस्कार मिळणार नाही. बान यांनी असेही म्हटले की, संजय राऊत हे पाकिस्तानचा रोज उदोउदो करतात, त्यामुळे त्यांना पाकिस्तानचा सर्वोच्च पुरस्कार मिळाला पाहिजे, तेवढीच त्यांची पात्रता आहे. या प्रकरणामुळे महाराष्ट्राच्या राजकारणात नवा वाद निर्माण झाला आहे.