Neelam Gorhe | सातारा पोलीस अधीक्षकांचे निलंबन करा, उपसभापती नीलम गोऱ्हेंकडून आदेश

सातारा जिल्हा परिषद निवडणुकीदरम्यान झालेल्या गोंधळाची विधानपरिषदेत गंभीर दखल घेण्यात आली आहे. विधानपरिषद उपसभापती नीलम गोऱ्हे यांनी या प्रकरणी कडक भूमिका घेत सातारा जिल्ह्याच्या पोलीस अधीक्षकांच्या निलंबनाचे निर्देश दिले आहेत. त्यांनी मंत्री उदय सामंत यांना यासंदर्भात आवश्यक कारवाई करण्याचे आदेश दिले. यासोबतच, सातारा जिल्हा परिषद आवारातील सर्व सीसीटीव्ही फुटेज ताब्यात घेऊन तपासासाठी वापरण्याचे निर्देशही देण्यात आले आहेत. या घटनेची सखोल चौकशी व्हावी यासाठी पुणे विभागीय आयुक्तांनाही लक्ष घालण्यास सांगण्यात आले आहे.

दरम्यान, या प्रकरणावरून शिवसेना शिंदे गटाचे मंत्री शंभूराज देसाई यांनी तीव्र प्रतिक्रिया दिली आहे. त्यांनी सातारा जिल्ह्यातील सुमारे 100 पोलिसांवर कारवाई करण्याची मागणी केली आहे. मंत्र्यांशी अरेरावी करणाऱ्या संबंधित पोलीस अधिकाऱ्यांवर कठोर कारवाई व्हावी, असेही त्यांनी स्पष्ट केले. या घटनेमुळे राज्यातील कायदा व सुव्यवस्थेचा प्रश्न पुन्हा एकदा चर्चेत आला आहे.