Sanjay Raut On Sharad Pawar | शरद पवार एनडीएसोबत जाणार का? संजय राऊत म्हणाले, खात्रीने सांगतो…

राज्यसभा निवडणुकीच्या पार्श्वभूमीवर राज्यातील राजकीय वातावरण चांगलेच तापले असून महाविकास आघाडीत एका जागेसाठी उमेदवारीवरून चर्चा रंगल्या आहेत. काँग्रेसला राज्यसभेतील विरोधी पक्षनेतेपद कायम ठेवण्यासाठी दोन खासदारांची आवश्यकता असल्याने महाराष्ट्रातून कोणाला उमेदवारी द्यावी, याबाबत पक्षांतर्गत हालचाली सुरू आहेत.
दरम्यान, राष्ट्रवादी काँग्रेसचे ज्येष्ठ नेते शरद पवार यांना राज्यसभेवर पाठविण्याबाबत चर्चा असल्याची राजकीय वर्तुळात चर्चा आहे. भविष्यात त्यांनी एनडीएसोबत जाण्याचा निर्णय घेतल्यास राज्यसभेतील काँग्रेसचे विरोधी पक्षनेतेपद धोक्यात येऊ शकते, अशीही राजकीय पातळीवर कुजबुज सुरू आहे. या पार्श्वभूमीवर शिवसेना ठाकरे गटाचे खासदार संजय राऊत यांनी माध्यमांशी संवाद साधताना या चर्चांवर प्रतिक्रिया दिली. राऊत म्हणाले, “हे सगळे मनाचे श्लोक आहेत. शरद पवार कधीही एनडीएसोबत जाणार नाहीत. मी इतकी वर्षे त्यांना ओळखतो. त्यामुळे खात्रीने सांगू शकतो की शरद पवार एनडीएसोबत जाणार नाहीत.” राज्यसभा निवडणुकीच्या तोंडावर या घडामोडींमुळे महाविकास आघाडीत राजकीय हालचालींना वेग आला असून पुढील काही दिवसांत उमेदवारीबाबत चित्र स्पष्ट होण्याची शक्यता आहे.