रोहित पवारांची तक्रार घेतली गेली पाहिजे तसे न झाल्यास…; शशिकांत शिंदेंनी स्पष्ट केली भूमिका

शशिकांत शिंदे यांनी महाराष्ट्रातील अनेक महत्त्वपूर्ण मुद्द्यांवर आपली भूमिका मांडली. रोहित पवारांनी एफआयआर नोंदवण्यासाठी बारामती गाठल्याचे त्यांनी सांगितले. एफआयआर नोंदवण्यात अडचण आल्यास भविष्यात आंदोलन करण्याचा इशारा त्यांनी दिला. डीजीसीएने विमान कंपन्यांविरुद्ध कारवाई केल्याचे उदाहरण देत, नियमानुसार एफआयआर दाखल करण्याची मागणी त्यांनी केली.

डान्स बार प्रकरणावर बोलताना, स्वर्गीय आर. आर. पाटील यांनी केलेल्या कायद्यातील पळवाटांचा गैरवापर होत असल्याचे ते म्हणाले. नवी मुंबई आणि पनवेल परिसरात डान्स बार पुन्हा सुरू झाल्याच्या तक्रारी असून, यात पोलिसांचे साटेलोटे असल्याचा गंभीर आरोप त्यांनी केला. गृहखात्याने यावर तातडीने कारवाई करावी, अशी अपेक्षा त्यांनी व्यक्त केली.

मुंबई महानगरपालिकेच्या अर्थसंकल्पात 36 हजार कोटींच्या एफडी तोडण्याच्या प्रस्तावावरही त्यांनी चिंता व्यक्त केली. केवळ मुंबईच नव्हे, तर राज्यातील इतर महानगरपालिका आणि स्थानिक स्वराज्य संस्थांच्या एफडी मोडण्याचा प्रयत्न सुरू असून, यातून सरकारच्या तिजोरीप्रमाणे महानगरपालिकेची तिजोरीही रिकामी होत असल्याचा दावा त्यांनी केला. महायुती सरकार आल्यापासून ही परिस्थिती सातत्याने दिसत असल्याचेही त्यांनी नमूद केले.