Sonam Wangchuk | आश्वासनं पूर्ण करा, आंदोलनाच्या मागण्या विसरलो नाही; सरकारला सोनम वांगचुक यांचा थेट इशारा

लडाखमध्ये परतल्यानंतर पर्यावरणवादी आणि सामाजिक कार्यकर्ते सोनम वांगचुक यांनी एक व्हिडिओ संदेश जारी करत केंद्र सरकारला दिलेल्या आश्वासनांची तातडीने पूर्तता करण्याचे आवाहन केले आहे. आंदोलन संपले असले तरी त्यामागील मूळ मुद्दे आणि मागण्या विसरलेल्या नाहीत, असे स्पष्ट करत त्यांनी सरकारने याबाबत ठोस भूमिका घ्यावी, असे म्हटले.

व्हिडिओ संदेशात सोनम वांगचुक यांनी आंदोलनादरम्यान मांडलेल्या मागण्या अद्यापही कायम असल्याचे सांगितले. आंदोलनाचा उद्देश केवळ तात्पुरता नसून लडाखच्या प्रश्नांवर दीर्घकालीन आणि न्याय्य तोडगा निघावा, हीच भूमिका असल्याचे त्यांनी नमूद केले.

यावेळी त्यांनी आंदोलनाच्या पार्श्वभूमीवर आत्महत्या केलेल्या व्यक्तींच्या कुटुंबीयांना जाहीर केलेली आर्थिक मदत तातडीने देण्याची आठवणही सरकारला करून दिली. संबंधित कुटुंबांना न्याय मिळावा आणि सरकारने आपल्या आश्वासनांची अंमलबजावणी विलंब न करता करावी, अशी मागणी त्यांनी केली.

दरम्यान, सोनम वांगचुक यांच्या या व्हिडिओ संदेशामुळे लडाखमधील प्रलंबित प्रश्न आणि आंदोलनादरम्यान सरकारने दिलेल्या आश्वासनांच्या पूर्ततेचा मुद्दा पुन्हा एकदा चर्चेत आला आहे.