नवीन नियम लागू! ST बसमध्ये सवलत हवी असेल तर आता हे कार्ड अनिवार्य

महाराष्ट्र राज्य मार्ग परिवहन महामंडळाच्या (एसटी) बसमधून सवलतीच्या दरात प्रवास करणाऱ्यांसाठी एक महत्त्वाचा नियम आजपासून लागू झाला आहे. आता महिला आणि ज्येष्ठ नागरिकांसह सवलतीचा लाभ घेणाऱ्या प्रवाशांसाठी नॅशनल कॉमन मोबिलिटी कार्ड (NCMC) अनिवार्य करण्यात आले आहे. हे कार्ड नसल्यास प्रवाशांना सवलतीचे तिकीट मिळणार नाही आणि त्यांना पूर्ण तिकीट दराने प्रवास करावा लागेल. या नियमामुळे अनेक प्रवाशांना अडचणींचा सामना करावा लागत आहे, कारण त्यांना अद्याप एनसीएमसी कार्ड कसे काढायचे याची पुरेशी माहिती नाही.

अनेक प्रवाशांनी सांगितले की यापूर्वी आधार कार्डवर सवलत मिळत होती, मात्र आता नवीन नियमामुळे कार्डशिवाय सवलत मिळणार नाही. ज्यांच्याकडे एनसीएमसी कार्ड नाही, त्यांना पूर्ण तिकीट लागेल, तर कार्डधारकांना सवलतीचा लाभ घेता येईल. दिव्यांग प्रवाशांसाठी सध्याची प्रणाली पूर्वीप्रमाणेच सुरू राहील असे स्पष्ट करण्यात आले आहे. प्रवाशांना एनसीएमसी कार्ड काढण्यासाठी शासनाने यापूर्वी दोन महिने आणि त्यानंतर एक महिना अशी सवलत दिली होती. मात्र, त्यानंतरही अनेक प्रवाशांनी कार्ड काढले नसल्याचे समोर आले आहे. शासनाच्या बाजूने यामध्ये कोणतीही अडचण नसल्याचे सांगण्यात आले आहे. त्यामुळे आता सवलतीच्या प्रवासासाठी एनसीएमसी कार्ड असणे आवश्यक आहे.