Sunil Tatkare | राष्ट्रवादीत पुन्हा खळबळ! सुनील तटकरे यांच्या विरोधात थेट निवडणूक आयोगात तक्रार; नियुक्तीवरच सवाल

राष्ट्रवादी काँग्रेसच्या अजित पवार गटाचे प्रदेशाध्यक्ष सुनील तटकरे यांच्या विरोधात निवडणूक आयोगात तक्रार दाखल करण्यात आल्याची माहिती समोर आली आहे. पक्षाच्या संविधानाला डावलून तटकरे यांची नियुक्ती करण्यात आल्याचा आरोप या तक्रारीत करण्यात आला आहे.

मंठा-परतूर विधानसभा मतदारसंघाचे अध्यक्ष भाऊसाहेब गोरे यांनी ही तक्रार दाखल केल्याची माहिती आहे. त्यामुळे राष्ट्रवादी काँग्रेसमधील अंतर्गत वाद पुन्हा एकदा समोर आला आहे.

दरम्यान, जालना जिल्ह्यातील राष्ट्रवादी काँग्रेसच्या काही पदाधिकाऱ्यांनीही तटकरे यांच्या कार्यपद्धतीवर आरोप केले आहेत. तटकरे यांच्या कार्यक्रमात घोषणा दिल्यामुळे काही पदाधिकाऱ्यांना त्यांच्या पदावरून हटवण्यात आल्याचा आरोप करण्यात आला आहे.

या संपूर्ण प्रकरणामुळे राष्ट्रवादी काँग्रेसच्या अजित पवार गटात अंतर्गत नाराजी वाढल्याची चर्चा सुरू झाली आहे. सुनील तटकरे यांच्या नियुक्तीविरोधातील तक्रारीवर निवडणूक आयोग काय निर्णय घेतो आणि या आरोपांवर तटकरे गटाकडून काय प्रतिक्रिया येते, याकडे आता राजकीय वर्तुळाचे लक्ष लागले आहे.