नागपूर : ‘द केरळ स्टोरी’ चित्रपट प्रदर्शित झाल्यानंतर वेगळ्याच प्रकारचे राजकारण सुरू झाले आहे. भाजप आणि भाजपचे नेते उघडपणे चित्रपटाचे समर्थन करताना दिसत आहेत. तर इतर काही पक्ष या चित्रपटावर बंदी घालण्याची मागणी करत आहेत. दरम्यान, आज राज्याचे उपमुख्यमंत्री देवेंद्र फडणवीस यांनी त्यांच्या काही सहकाऱ्यांसोबत द केरळ स्टोरी हा चित्रपट पाहिला. त्यानंतर त्यांनी यावर आपली प्रतिक्रिया दिली. ते म्हणाले ‘द केरळ स्टोरी’ या चित्रपटातून एक धक्कादायक सत्य समोर आले आहे. वास्तविक, हा केवळ चित्रपट नसून लोकांना जागरूक करण्याचे माध्यम आहे. या चित्रपटातून एक धक्कादायक सत्य मांडण्यात आले आहे. जे आमच्या बहिणींसोबत असे कोणते षडयंत्र सुरू आहे, हे सर्वांसमोर आले पाहिजे. हा चित्रपट पाहिल्यानंतर अनेकांचे डोळे उघडतील. तर एक हृदयद्रावक सत्य सिनेमातून समोर आणले जात आहे. समाजात भेदभाव कसा निर्माण केला जातो आणि महिलांवर कसा अन्याय होतो, या सगळ्या गोष्टी यात दाखवल्या आहेत असेही फडणवीस म्हणाले.