पुण्यात वंचित बहुजन आघाडीची काळी दिवाळी! चटणी-भाकरी खाऊन सरकारचा निषेध, शेतकऱ्यांसाठी अनुदानाची मागणी

पुण्यात जिल्हाधिकारी कार्यालयाबाहेर वंचित बहुजन आघाडीकडून आंदोलन करण्यात आले आहे. या आंदोलनादरम्यान वंचितच्या कार्यकर्त्यांनी चटणी-भाकरी खाऊन काळी दिवाळी साजरी केली. सरकारने शेतकऱ्यांना वाऱ्यावर सोडले असल्याचा आरोप वंचित बहुजन आघाडीने केला आहे. राज्यात सर्वत्र दिवाळीचा उत्साह असताना, दुष्काळामुळे शेतकऱ्यांची दिवाळी मात्र संकटात सापडली आहे. राज्य सरकारने दुष्काळाच्या काळात शेतकऱ्यांना कोणतीही मदत केली नाही, असा वंचित बहुजन आघाडीचा आरोप आहे.

शेतकऱ्यांना पाच हजार रुपये अनुदान देण्याचे सरकारने मान्य केले होते, परंतु अद्याप ते मिळाले नसल्याचे आंदोलकांनी म्हटले आहे. जर पाच हजार रुपये मिळाले नसतील, तर त्या पैशांशिवाय शेतकऱ्यांची दिवाळी कशी साजरी होणार, असा सवालही वंचितने उपस्थित केला आहे. या आंदोलनाद्वारे वंचित बहुजन आघाडीने सरकारचे लक्ष वेधण्याचा प्रयत्न केला आहे. दुष्काळग्रस्त शेतकऱ्यांच्या मदतीसाठी सरकारने तातडीने उपाययोजना कराव्यात, अशी मागणी यावेळी करण्यात आली. कॅमेरामॅन अभिजित पिसाळसह प्रदीप कापसे, टीव्ही 9 मराठी, पुणे यांनी याबाबत माहिती दिली.