Kalyan Theft : लोकलमधून मोबाईल लंपास करणारा सराईत चोरटा गजाआड, पोलिसांनी केली आठ गुन्ह्यांची उकल

कल्याण : लोकलमध्ये गर्दीचा फायदा घेत प्रवाशांचे मोबाईल (Mobile) लंपास करणाऱ्या सराईत चोरट्याला कल्याणच्या लोहमार्ग पोलिसांनी स्टेशन परिसरातून बेड्या ठोकल्या आहेत. त्याच्याकडून 8 महागडे मोबाईल हस्तगत (Seized) केले आहे. किसन परमार असे अटक (Arrest) करण्यात आलेल्या आरोपीचे नाव आहे. पोलिसांनी आरोपीला अटक करुन चौकशी केली असता त्याने 8 गुन्ह्यांची कबुली दिली आहे. पोलिसांच्या माहितीनुसार, परमार हा सराईत गुन्हेगार आहे. तो नशा करण्यासाठी मोबाईल चोरी करून मुंबईच्या चोर बाजारात विकत असे. आरोपीने अजून किती ठिकाणी चोरी केली याचा तपास पोलीस करत आहेत.

प्रवाशाच्या बॅगेतून मोबाईल काढताना आरोपीला रंगेहाथ पकडले

कल्याण रेल्वे पोलीस ठाण्यात मोबाईल चोरी होण्याच्या तक्रारींमध्ये वाढ झाली होती. या पार्श्वभूमीवर कल्याण रेल्वे पोलिसांनी या चोरट्यांचा माग काढणे सुरू केलं. कल्याण स्टेशन परिसरात रेल्वे पोलिसांचे गस्त सुरू केले आहे. अशाच प्रकारे ग्रस्त घालत असताना कल्याण लोहमार्ग पोलिसांना स्टेशन परिसरात प्रवाशाच्या बॅगेत हात टाकून मोबाईल लंपास करत असताना किसन परमार रंगेहाथ सापडला. पोलिसांनी त्याला ताब्यात घेत त्याची झडती घेतली असता त्याच्याकडे एक दोन नव्हे तर चक्क आठ मोबाईल आढळले. चौकशी दरम्यान हे आठही मोबाईल चोरीचे असल्याचे निष्पन्न झाले. पोलिसांनी त्याला विचारणा केली असता परमारने रेल्वे स्टेशनवर लोकल एक्सप्रेसमध्ये चढता उतरताना प्रवाशांच्या होणाऱ्या गर्दीचा फायदा घेत कल्याण स्टेशन परिसरात 8 गुन्हे केल्याची कबुली दिली. (A thief who stole a mobile phone from a local was arrested by the Kalyan Railway Police)