Nashik: व्हिस्की, रम अन् बरंच काही…बंदी असलेले 10 लाखांचे विदेशी मद्य, 105 बॉक्स जप्त
कोरोना काळात मद्याची दुकाने बंद होती. तेव्हापासून मद्य तस्करीच्या प्रमाणात वाढ झाल्याची शक्यता वर्तवण्यात येत आहे.
नाशिकः महाराष्ट्रात बंदी असलेला तब्बल 10 लाख 4 हजार रुपयांचा विदेशी मद्यसाठा नाशिक पोलिसांनी जप्त केला आहे. मुंबई आग्रा रोडवरील शिवाजी पुतळ्याच्या समोर पाथर्डी फाटा या ठिकाणी ही कारवाई करण्यात आली. पोलिसांनी एकूण 105 बॉक्स जप्त केलेत. त्यात व्हिस्की, रम पासून अनेक प्रकारचे मद्य आढळले.
डोळ्यात तेल घालून पहारा…
नाशिकमध्ये सध्या राज्य उत्पादन शुल्क विभागाकडून कारवाई सुरू आहे. त्यात मद्याची अवैध विक्री, निर्मिती विरोधात धडक मोहीम राबवण्यात येत आहे. त्यासाठी पथके डोळ्यात तेल घालून रात्रीचा दिवस करत आहेत. मुंबई आग्रा रोडवरील शिवाजी पुतळ्यासमोरही पथकाची गस्त सुरू होती. येणाऱ्या आणि जाणाऱ्या प्रत्येक वाहनाची कसून झडती आणि वाहन चालकाची चौकशी सुरू होती. यावेळी एका वाहनात पथकाला महाराष्ट्रात बंदी आणि गोव्यात विक्रीसाठी परवानगी असलेला मोठा मद्यसाठा आढळून आला.
या प्रकारचे मद्य…
पथकाने एकूण एकशे पाच मद्याचे बॉक्स जप्त केले. त्याची किंमत अंदाजे दहा लाख चार हजारांच्या घरात आहे. यामध्ये बॉम्बे व्हिस्की 750 मिली क्षमतेच्या 420 सीलबंद बॉक्स, गोल्डन एस. व्हिस्कीच्या 750 मिली क्षमतेचे 35 बॉक्स, ब्लॅक रमच्या 750 मिली क्षमतेच्या 420 सीलबंद बाटल्याचे 35 बॉक्स असे एकूण 105 बॉक्स सापडले. यावेळी पोलिसांनी आरोपींनाही बेड्या ठोकल्या.
आरोपी कोल्हापूरचे
पोलिसांनी संशयित आरोपी अतुल तानाजी कांबळे (वय 32, रा. गडमुडशिंगी, ता. करवीर, जिल्हा कोल्हापूर) तसेच दुसरा आरोपी सचिन सदाशिव कांबळे (वय 19, रा. गांधीनगर, ता. करवीर, जि. कोल्हापूर) यांना ताब्यात घेतले आहे. सोबतच आरोपींनी मद्य साठ्याच्या वाहतुकीसाठी वापरलेले चारचाकी वाहनही पोलिसांनी जप्त केले आहे.
इतर आरोपींचा शोध सुरू
पोलिसांनी या प्रकरणात इतर आरोपी आहेत का, याचा शोध सुरू केला आहे. गोव्यामध्ये परवानगी आणि महाराष्ट्रात बंदी असलेले मद्य विकण्याची एक साखळी असेल. हे मद्य विशिष्ट दुकानापर्यंत पोहचवले जात असेल किंवा हे मद्य खरेदी करणारे काही व्यावसायिक असतील. त्यांची साखळी समोर आणण्याचे मोठे आव्हान आता पोलिसांसमोर आहे. दरम्यान, कोरोना काळात मद्याची दुकाने बंद होती. तेव्हापासून मद्य तस्करीच्या प्रमाणात वाढ झाल्याची शक्यता वर्तवण्यात येत आहे.
Health Care : फळे खाल्ल्यानंतर लगेचच पाणी पिणे आरोग्यासाठी धोकादायक, वाचा अधिक!https://t.co/utzB0ZkKLN | #Healthcare | #Water | #dangerous | #Healthcaretips | #lifestyle |
— TV9 Marathi (@TV9Marathi) November 15, 2021
इतर बातम्याः
