Maharashtra News LIVE : पश्चिम आशियातील भारताची शेतमाल निर्यात धोक्यात

आज जागतिक महिला दिनाचे औचित्य साधून राज्यभरात उत्साह पाहायला मिळत असून विविध सक्षमीकरण उपक्रमांचे आयोजन करण्यात आले आहे. नागपूर महानगरपालिकेतर्फे आयोजित पिंक मॅरेथॉनला प्रसिद्ध समाजसेविका अमृता फडणवीस यांच्या हस्ते हिरवा झेंडा दाखवून प्रारंभ केला. तर मुंबईतील गोरेगाव आरे परिसरात भाजप महिला मोर्चाच्या वतीने ८०० हून अधिक महिलांच्या सहभागासह भव्य महासाडी वॉकाथॉन पार पडत आहे. क्रीडा क्षेत्रात महिलांचा सहभाग वाढवण्यासाठी केंद्रीय राज्यमंत्री रक्षा खडसे यांच्या उपस्थितीत अस्मिता आणि खेलो इंडिया अंतर्गत विशेष कार्यक्रमांचे आयोजन करण्यात आले आहे. तर दुसरीकडे, सावित्रीबाई फुले पुणे विद्यापीठ चौकातील बहुप्रतिक्षित उड्डाणपुलाचे उद्घाटन आज मुख्यमंत्री देवेंद्र फडणवीस यांच्या हस्ते होणार आहे. या सोहळ्याला उपमुख्यमंत्री एकनाथ शिंदे, सुनेत्रा पवार आणि केंद्रीय राज्यमंत्री मुरलीधर मोहोळ यांची प्रमुख उपस्थिती असेल. या उड्डाणपुलामुळे चतु:श्रृंगी आणि पाषाण परिसरातील वाहतूक कोंडीतून पुणेकरांची मोठी सुटका होणार आहे. महाराष्ट्र, देश विदेश, क्रीडा, मनोरंजन क्षेत्रातील प्रत्येक महत्वाच्या बातमीचे अपडेट्स तुम्हाला या ब्लॉगमधून जाणून घेण्यात येतील.