CCTV | उधारी परत करण्याचा तगादा, पुण्यात 34 वर्षीय तरुणाच्या हत्येचा थरार सीसीटीव्हीत कैद

युवराज जाधव याने आरोपी गणेश खरात याला व्याजाने पैसे दिले होते. मात्र खरात युवराजला परत पैसे देत नसल्याने दोन दिवसांपूर्वी दोघांमध्ये वाद झाला. यामध्ये युवराजने खरातला शिवीगाळ केली होती.

पुण्यात हत्येचा थरारImage Credit source: टीव्ही9

Reporter Ashwini Satav Doke | Updated on: Apr 07, 2022 | 9:23 AM

पुणे : व्याजाच्या पैशावरुन झालेल्या वादातून तरुणाची हत्या (Pune Murder) झाल्याची धक्कादायक घटना समोर आली आहे. कुऱ्हाडीने वार करुन पुण्यात 34 वर्षीय तरुणाचा खून करण्यात आला होता. पापडे वस्ती फुरसुंगी येथे रविवारी सायंकाळी सव्वासात वाजताच्या सुमारास हा खळबळजनक प्रकार घडला होता. या घटेनेचे सीसीटीव्ही फुटेज (CCTV Footage) समोर आले आहे. भरवस्तीत खून झाल्याने स्थानिकांमध्ये दहशत पसरली आहे. या प्रकरणी हडपसर पोलिसांनी आरोपीला गजाआड केले आहे. उधारी परत करण्याचा तगादा लावल्याने आरोपीने तरुणाचा खून केल्याचा आरोप आहे.

काय आहे प्रकरण?

युवराज बबन जाधव (वय 34 वर्ष, रा.पापडेवस्ती, भेकराईनगर फुरसुंगी ) असे खून झालेल्या तरुणाचे नाव आहे. याबाबत बबन जाधव (वय 55 वर्ष, रा. पापडेवस्ती, फुरसुंगी ) यांनी हडपसर पोलिस ठाण्यात फिर्याद दिली आहे. त्यानुसार पोलिसांनी गणेश सुरेश खरात (वय 30 वर्ष, रा.पापडेवस्ती, फुरसुंगी ) याच्या विरुद्ध खुनाचा गुन्हा दाखल करुन त्याला अटक केली आहे.

नेमकं काय घडलं?

पोलिसांनी दिलेल्या माहितीनुसार दिलेल्या माहितीनुसार, युवराज जाधव याने आरोपी गणेश खरात याला व्याजाने पैसे दिले होते. मात्र खरात युवराजला परत पैसे देत नसल्याने दोन दिवसांपूर्वी दोघांमध्ये वाद झाला. यामध्ये युवराजने खरातला शिवीगाळ केली होती. त्यातूनच रागाच्या भरात खरातने युवराज याला घरासमोर कुऱ्हाडीने सपासप घाव घालून ठार केले. त्यानंतर खरात पसार झाला होता.

आरोपीला अटक

रक्ताच्या थारोळ्यात पडलेल्या तरुणाला पाहून नागरिकांमध्ये भीती पसरली होती. हडपसर पोलिसांनी धाव घेऊन मृतदेह ससून रुग्णालयात शव विच्छेदनासाठी पाठवला आहे. या प्रकरणी हडपसर पोलीस ठाण्यात खुनाचा गुन्हा दाखल करण्यात आला आहे. या प्रकरणी हडपसर पोलिसांनी आरोपीला गजाआड केले आहे.

पाहा व्हिडीओ :

CCTV | उधारी परत करण्याचा तगादा, पुण्यात 34 वर्षीय तरुणाच्या हत्येचा थरार सीसीटीव्हीत कैद #Pune #Crime pic.twitter.com/FcdwEnPEby

— TV9 Marathi (@TV9Marathi) April 7, 2022