Solapur Crime : सोलापुरात दोन गटात तुफान दगडफेक, काही जणांना घेतले ताब्यात, घटनास्थळी कडक बंदोबस्त तैनात
गणेशोत्सवानिमित्ता मंडळाची बैठक होती. बैठकीनंतर काही जण चहा प्यायला गेले होते. मात्र काही वेळात रस्त्यावर एकच गोंधळ उडाला. पोलीस वेळीच धावून आले म्हणून अनर्थ टळला.
सोलापूर / 17 ऑगस्ट 2023 : सोलापुरात दोन गटात तुफान दगडफेक झाल्याची घटना काल मध्यरात्री घडली. शहरातील शास्त्रीनगर परिसरात मध्यरात्री दोन गट आमने सामने आले. एकमेकांवर तुफान दगडफेक करत जोरदार घोषणाबाजी केल्याची माहिती मिळते. रात्री साडेबारा ते एक वाजण्याच्या दरम्यान हा प्रकार घडला. घटनेची माहिती मिळताच पोलिसांनी घटनास्थळी जाऊन परिस्थिती नियंत्रणात आणली. घटनास्थळी मोठा फौजफाटा तैनात कारण्यात आला आहे. दरम्यान, दगडफेकीचे कारण अद्याप अस्पष्ट आहे. कायदा-सुव्यवस्थेचा भंग करणाऱ्या काही युवकांना पोलिसांनी ताब्यात घेतले आहे. पोलिसांनी वेळीच प्रसंगावधान राखत घटनास्थळी धाव घेत परिस्थिती नियंत्रणात आणली. याप्रकरणी 10 जणांवर गुन्हे दाखल करत त्यांना अटक केली आहे.
दुर्गादास विजय म्हेत्रे, सागर दिपक कोरे, प्रशांत हिरालाल सोंडेकर, प्रथमेश संजय कोल्लुर, महेश रमेश कोरे, संतोष वसंत मरेड्डी, गणेश भारत रोकडे, पंकज संजय कोल्लुर, योगीराज राजू म्हेत्रे, अरबाज शब्बीर बेपारी अशी गुन्हा दाखल झालेल्या आरोपीची नावं आहेत. सुदैवाने यात कोणतीही मोठी हानी झाली आहे.
काय आहे प्रकरण?
गणेशोत्सव तोंडावर आला असून, यानिमित्त सतनाम चौकात गणेशोत्सव मंडळाच्या पदाधिकारी निवडीची बैठ आयोजित करण्यात आली होती. बैठकीनंतर काही कार्यकर्ते शास्त्रीनगर परिसरात चहा पिण्यासाठी गेले. यावेळी या कार्यकर्त्यांनी जोरदार घोषणाबाजी केली. त्यानंतर दुसऱ्या गटानेही घोषणाबाजी केली. यावरुन दोन्ही गटात जुंपली आणि दोन्ही गटात दगडफेक सुरु झाली.
घटनेची माहिती मिळताच सदर बाजार पोलीस घटनास्थळी दाखल झाले. पोलिसांनी गर्दीला पांगवत परिस्थिती नियंत्रणात आणली. पोलिसांनी 10 जणांना ताब्यात घेत गुन्हा दाखल केला. अटक आरोपीविरोधात भादवि कलम 143, 147, 160, 323 नुसार गुन्हा नोंद करण्यात आला आहे. या घटनेनंतर परिसरात तणावपूर्ण शांतता असून, अद्यापही या परिसरात पोलीस बंदोबस्त आहे.
