जलवाहिनी दुरुस्तीसाठी खड्डा खोदला होता, खेळता खेळता चिमुकले खड्ड्याजवळ गेले अन्…

अंबरनाथ / निनाद करमरकर : जलवाहिनी दुरुस्तीसाठी खोदलेल्या खड्ड्यात पडून दोन लहान मुलांचा मृत्यू झाल्याची दुर्दैवी घटना अंबरनाथमध्ये घडली आहे. याप्रकरणी ठेकेदारावर गुन्हा दाखल करण्याची मागणी करण्यात येत आहे. अंबरनाथच्या नेवाळी परिसरात ही दुर्दैवी घटना घडली. या घटनेमुळे नेवाळी परिसरात शोककळा पसरली आहे. चिमुकल्यांच्या अचानक जाण्याने दोन कुटुंबावर दुःखाचा डोंगर कोसळला आहे. हिललाईन पोलीस ठाण्यात आकस्मिक मृत्यूची नोंद करण्यात आली असून, पोलीस याप्रकरणी अधिक तपास करत आहेत.

जलवाहिनी दुरुस्तीसाठी खोदला होता खड्डा

अंबरनाथच्या नेवाळी परिसरात जलवाहिनीच्या दुरुस्तीसाठी ठेकेदाराने खड्डा खोदला होता. या खड्ड्यात पाणी देखील साचलं होतं. मात्र खड्ड्याभोवती कोणत्याही प्रकारच्या सुरक्षात्मक उपायोजना किंवा बॅरिकेडिंग केलेली नव्हती. खड्ड्याजवळ वस्ती असल्याने वस्तीतील 8 वर्षाचा आणि 6 वर्षाचा अशी दोन लहान मुले खेळता खेळता खड्ड्याजवळ गेली.

खेळताना तोल जाऊन खड्ड्यात पडले

खेळत असताना तोल जाऊन दोघेही खड्ड्यात पडले आणि पाण्यात बुडून त्यांचा मृत्यू झाला. याप्रकरणी हिललाईन पोलिसांनी अकस्मात मृत्यूची नोंद केली आहे. ठेकेदाराच्या हलगर्जीपणामुळे दोन चिमुकल्यांना आपला जीव गमवावा लागला. यामुळे स्थानिकांनी ठेकेदारावर गुन्हा दाखल करण्याची मागणी केली आहे.

डोंबिवली-बदलापूर राज्य महामार्ग रोखला

ठेकेदाराच्या चुकीमुळे दोन लहान मुलं बुडाल्याने संतप्त नातेवाईकांनी डोंबिवली बदलापूर राज्य महामार्ग रोखून धरला. नेवाळी, डावलपाडा परिसरात मुख्य महामार्ग रोखला. ठेकेदारावर सदोष मनुष्यवधाचा गुन्हा दाखल करण्याची मागणी आंदोलनकर्त्यांनी केली आहे. पोलिसांनी मध्यस्थी करत आंदोलनकर्त्यांची समजूत काढली आणि रस्ता मोकळा केला.