25 फुटाच्या भिंतीवरुन उडी, हत्येच्या आरोपातील जेरबंद आरोपीचे पलायन, तळोजा कारागृहाची सुरक्षा व्यवस्था वाऱ्यावर ?

नवी मुंबई : भांडुप येथील एका अल्पवयीन मुलाच्या हत्या प्रकरणात तळोजा कारागृहात कैदेत असलेल्या संजय यादव नामक आरोपीने पलायन केले आहे. कारागृहातील गार्डची नजर चुकवून 25 फूट उंच असलेल्या सुरक्षा भिंतीवरुन उडी टाकून आरोपीन पलायन केले आहे. पोलीस या आरोपीचा शोध घेत आहेत. मात्र, तो अद्याप पोलिसांच्या हाती लागलेला नाही. या आरोपीसह त्याच्यासोबत पळून जाताना पकडला गेलेल्या आरोपीविरोधात खारघर पोलीस ठाण्यात गुन्हा दाखल करण्यात आला आहे. (Undertrial sanjay yadav escape from taloja jail police files case)

पळून गेलेला आरोपी हत्येच्या गुन्ह्यातील आरोपी

मिळालेल्या माहितीनुसार पळून गेलेला आरोपी संजय यादव हा भांडूप येथील रहिवासी आहे. 2018 मध्ये भांडूपमध्ये झालेल्या एका 17 वर्षीय मुलाच्या हत्या प्रकरणात त्याला भांडूप पोलिसांनी अटक केली होती. त्यानंतर संजय यादव याची तळोजा कारागृहात रवानगी करण्यातआली होती. 18 सप्टेंबर रोजी सकाळी 11 वाजण्याच्या सुमारास आरोपी संजय यादव आणि राहुल जैस्वाल दोघेही औषध घेण्याच्या बहाण्याने आपल्या बॅरिकेटमधून बाहेर पडले होते.

25 फूट उंच भिंतीवर चढून उडी टाकली

त्यानंतर दोघेही जेलमधील रुग्णालयाजवळ गेले असताना, तेथील वॉच टॉवरवर गार्ड नसल्याचे त्यांच्या निदर्शनास आले. त्यामुळे दोघेही वॉच टॉवरच्या जाळीचा दरवाजा उघडून वॉच टॉवरवर चढले. त्यानंतर संजय यादव याने वॉच टॉवरला लागून असलेल्या तळोजा जेलच्या 25 फूट उंच भिंतीवर चढून तेथून बाहेर उडी टाकून पलायन केले.

पळून जाणाऱ्या दुसऱ्या साथीदारास पकडण्यात पोलीस यशस्वी 

यावेळी त्याच्यासोबत असलेला राहुल जैस्वाल हा दुसरा आरोपी भिंतीवरुन उडी टाकण्यास घाबरल्याने तो वॉच टॉवरवरच थांबला. हा प्रकार वॉच टॉवरवर तैनात असलेल्या गार्डच्या निदर्शनास आल्यानंतर त्याने तत्काळ राहुल जैस्वाल याला पकडले. तसेच पळून गेलेल्या संजय यादव याची माहिती जेल प्रशासनाला दिली. त्यानंतर कारागृहातील सुरक्षा रक्षकांनी भिंतीवरुन उडी टाकून पळून गेलेल्या संजय यादव याचा शोध घेण्याचा प्रयत्न केला. मात्र, तो त्यांना सापडला नाही.

पळून गेलेल्या आरोपीविरोधात गुन्हा दाखल

त्यानंतर पोलिसांनी संजय यादव राहत असलेल्या भांडूप येथील घरी जाऊन त्याचा शोध घेतला. मात्र, तेथेही तो सापडला नाही. त्यामुळे तळोजा जेल प्रशासनाच्या वतीने पळून गेलेला आरोपी संजय यादव आणि त्याच्यासोबत पळून जाण्याच्या प्रयत्नात असलेला राहुल जैस्वाल या दोघांविरोधात खारघर पोलीस ठाण्यात गुन्हा दाखल करण्यात आला आहे.

दरम्यान, हत्येसारख्या गुन्ह्यात आरोपी असलेला कैदी पळून जाण्यास यशस्वी ठरल्यामुळे मोठी टीका केली जात आहे. तळोजा कारागृहाची सुरक्षा व्यवस्थेवर प्रश्नचिन्ह उपस्थित केले जात आहेत.

इतर बातम्या :

आधी बिअर पाजली, नंतर मरेपर्यंत ट्रकखाली चिरडलं, सोबत राहण्याचा हट्ट धरणाऱ्या प्रेमिकेचा शेवटी काटा काढला

आईची स्क्रुड्रायव्हरने हत्या, अडीच वर्षांपासून फरार, शेअर मार्केटचं वेड लागलेल्या ‘त्या’ तरुणाला अखेर बेड्या

इलेक्ट्रिक हिटर छातीला कवटाळून आयुष्य संपवलं, विवाहितेच्या आत्महत्येने पुणे हादरलं

(Undertrial sanjay yadav escape from taloja jail police files case)