Ravi Kishan: रवी किशन यांची 3 कोटी रुपयांची फसवणूक; नेमकं काय आहे प्रकरण?

मुंबई- प्रसिद्ध भोजपुरी अभिनेते आणि गोरखपूरचे (Gorakhpur) भाजपचे खासदार रवी किशन (Ravi Kishan) यांची फसवणूक झाल्याची माहिती समोर येत आहे. रवी किशन यांची तीन कोटी रुपयांची फसवणूक झाली आहे. याप्रकरणी गोरखपूरच्या कँटॉनमेंट पोलीस ठाण्यात त्यांनी तक्रार दाखल केली आहे. एका बिल्डरने त्यांची तीन कोटी रुपयांची फसवणूक केल्याचा आरोप त्यांनी या तक्रारीत केला आहे. याप्रकरणी पोलीस पुढचा तपास करत आहेत. रवी किशन यांच्या तक्रारीवरून भारतीय दंड संहितेच्या कलम 406 अंतर्गत पोलिसांनी गुन्हा दाखल केला आहे.

मुंबईस्थित एका व्यावसायिकाने त्यांची फसवणूक केल्याची माहिती रवी किशन यांच्या पीआर अधिकाऱ्याने दिली. 2012 मध्ये त्यांनी जैन जितेंद्र रमेश यांना तीन कोटी रुपये दिले होते. हेच पैसे परत मागितले तर त्याने रवी किशन यांची फसवणूक केली.

संबंधित व्यावसायिकाने रवी किशन यांना 34 लाखांचे 12 चेक दिले. यापैकी एक चेक बँकेत जमा केला असता, तो बाऊन्स झाला. आपली फसवणूक झाल्याचं लक्षात येताच रवी किशन यांनी पोलिसांत तक्रार दाखल केली.

एप्रिल महिन्यात रवी किशन यांनी ट्विट करत आपल्या वैयक्तिक समस्यांचा उल्लेख केला होता. आई कॅन्सर पीडित असल्याचं त्यांनी या ट्विटमध्ये सांगितलं होतं. रवी किशन यांच्या आईवर मुंबईतील टाटा कॅन्सर रुग्णालयात उपचार सुरू आहेत.

रवी किशन यांनी बॉलिवूड, भोजपुरी, मराठी, तेलुगू, कन्नड आणि गुजराती चित्रपटांमध्येही काम केलं आहे. भोजपुरी मनोरंजनविश्वातील ते सुपरस्टार आहेत.