Neetu Kapoor: “त्यांना सतत रडणारी विधवा पहायची होती, पण..”; ट्रोल करणाऱ्यांना नीतू कपूर यांचं सडेतोड उत्तर

दोन वर्षांपूर्वी ज्येष्ठ अभिनेते ऋषी कपूर (Rishi Kapoor) यांचं कॅन्सरने निधन झालं. त्यांच्या निधनानंतर काही महिन्यांनी त्यांच्या पत्नी नीतू कपूर (Neetu Kapoor) या सोशल मीडियावर सक्रिय झाल्या होत्या. सोशल मीडियावर त्या विविध फोटो आणि व्हिडीओ पोस्ट करतात. अनेकदा त्यांच्या या पोस्टवर नेटकऱ्यांनी टीका केल्या होत्या. ‘पतीच्या निधनानंतर दु:ख व्यक्त करण्याऐवजी तुम्ही काय एंजॉय करताय’, अशा शब्दांत नेटकऱ्यांनी त्यांना ट्रोल केलं होतं. या ट्रोलिंगला (Trolling) नीतू कपूर यांनी नुकत्याच दिलेल्या एका मुलाखतीत उत्तर दिलं आहे. त्याचप्रमाणे ट्रोल करणाऱ्यांना थेट ब्लॉक करत असल्याचं त्यांनी सांगितलं. “काही जण रडून स्वत:ला सावरतात तर काही हसून. मी माझ्या पतीला कधीच विसरू शकत नाही,” असंदेखील त्या म्हणाल्या.

काय म्हणाल्या नीतू कपूर?

‘फिल्म कम्पॅनियन’ला दिलेल्या मुलाखतीत त्या म्हणाल्या, “मला आवडतं म्हणून मी ते करते. मी ते एंजॉय करते. मला माझे फॉलोअर्स आवडतात. जे मला ट्रोल करतात त्यांना मी सरळ ब्लॉक करते. अशी काही लोकं असतात जे म्हणायचे, ‘पतीचं निधन झालं आणि ही एंजॉय करतेय.’ त्यांना रडणारी विधवा पहायची होती. पण अशा लोकांना मी ब्लॉक करते. मी असं म्हणेन की मला असंच राहायचं आहे आणि मी अशीच राहीन. अशाच पद्धतीने मी दु:खातून सावरते. काही जण रडून स्वत:ला सावरतात तर काही हसून. मी माझ्या पतीला कधीच विसरू शकत नाही. ते माझ्यासोबत, माझ्या मुलांसोबत इथेच आहेत. आजही जेव्हा आम्ही एकत्र जेवायला बसतो, तेव्हा अर्धा वेळ आम्ही त्यांच्याबद्दलच बोलत असतो. अशाच पद्धतीने आम्ही त्यांची आठवण काढतो. रणबीरच्या स्क्रीनसेव्हरवर त्यांचा फोटो कायम असतो. पण त्यांची आठवण काढण्यासाठी आम्हाला दु:खी व्हायची गरज नाही. आम्ही त्यांच्या आठवणी साजरं करू शकतो. त्यांच्या आठवणींनी आमच्या चेहऱ्यावर हास्य येतं.”

इन्स्टा पोस्ट-

View this post on Instagram

A post shared by neetu Kapoor. Fightingfyt (@neetu54)

नीतू कपूर या इन्स्टाग्रामवर बऱ्यापैकी सक्रिय असून त्यांचे जवळपास 18 लाख फॉलोअर्स आहेत. नीतू यांनी ऋषी कपूर यांच्याशी 1980 मध्ये लग्नगाठ बांधली. या दोघांना रिधिमा आणि रणबीर ही दोन मुलं आहेत. ऋषी कपूर यांची कॅन्सरशी झुंज अपयशी ठरली. 2020 मध्ये त्यांनी अखेरचा श्वास घेतला.