लिव्हर कॅन्सर सर्जरीनंतर दीपिकाची अशी अवस्था; मानेवरच्या खुणा पाहून नेटकरी चिंतेत

‘ससुराल सिमर का’ या मालिकेतून घराघरात पोहोचलेली अभिनेत्री दीपिका कक्करला लिव्हर कॅन्सरचं निदान झालं होतं. दीपिकाने सोशल मीडियावर पोस्ट लिहित चाहत्यांना याबद्दलची माहिती दिली होती. नुकतीच तिच्यावर लिव्हर कॅन्सरची सर्जरी करण्यात आली. तब्बल 14 तासांच्या सर्जरीनंतर दीपिकाला काही तास आयसीयूमध्ये ठेवण्यात आलं होतं. त्यानंतर 11 दिवस ती रुग्णालयातच होती. आयुष्यातील या सर्वांत कठीण काळात दीपिकाचा पती आणि अभिनेता शोएब इब्राहिम आणि तिच्या कुटुंबीयांनी तिची खूप साथ दिली. रुग्णालयात घालवलेल्या वेदनादायी दिवसांबद्दल दीपिका नुकतीच तिच्या व्लॉगमध्ये व्यक्त झाली. यावेळी तिने तिच्या मानेवरील खुणासुद्धा दाखवल्या आहेत.

सर्जरीनंतर दीपिका आता तिच्या घरी आली आहे. घरी आल्यानंतर 12 दिवसांनंतर दीपिकाने तिचे केस धुतले आणि मानेवरील खुणा चाहत्यांना दाखवल्या. दीपिकाच्या मानेवर छोट्या-छोट्या बऱ्याच खुणा दिसल्या. याविषयी ती म्हणाली, “आता मी ठीक आहे. 12 दिवसांनंतर मी माझे केस धुवू शकले. त्यामुळे मला आता खूप हलकं वाटतंय.” दीपिका आणि शोएबने व्हिडीओ शेअर करत याविषयीची माहिती दिली. सर्जरीनंतर हळूहळू दीपिकाच्या प्रकृतीत सुधारणा होत आहे. परंतु पूर्णपणे ठीक व्हायला तिला अजूनही काही वेळ लागणार आहे.

सर्जरीनंतरही दीपिकाने तिच्या हॉस्पिटलच्या बेडवरून चाहत्यांशी संवाद साधला होता. तिच्यासाठी प्रार्थना केल्याबद्दल तिने सर्व चाहत्यांचे आभार मानले होते. चाहत्यांना तब्येतीविषयी सांगताना दीपिकाला अश्रू अनावर झाले होते. पाणावलेल्या डोळ्यांनी ती म्हणालेली, “माझ्या प्रकृतीत आता सुधारणा होत आहे. शोएबने सांगितल्याप्रमाणे मला खोकल्याचा त्रास जाणवत होता. खोकल्यामुळे माझ्या टाक्यांवर खूप ताण येत होता. पण आता मी पूर्वीपेक्षा खूप बरी आहे.” हे सांगतानाच दीपिकाला रडू कोसळतं, तेव्हा शोएब तिला आधार देतो. शस्त्रक्रिया झाल्यापासून ती खूप भावनिक झाल्याचं शोएब यावेळी चाहत्यांना सांगतो. छोट्या-छोट्या गोष्टींवरही तिला रडू कोसळतंय.

शोएब इब्राहिम आणि दीपिका कक्कर यांनी 2018 मध्ये लग्न केलं. ‘ससुराल सिमर का’ या मालिकेच्या सेटवर दोघं एकमेकांच्या प्रेमात पडले होते. शोएबशी लग्नानंतर दीपिकाने अभिनयातून ब्रेक घेतला. आंतरधर्मीय लग्नामुळे अनेकदा दीपिकाला ट्रोलिंगचाही सामना करावा लागला होता.