Ekta Kapoor: एकता कपूरने करण जोहरवर साधला निशाणा, ‘तुम करो तो लस्ट स्टोरीज, हम करे तो..’

मुंबई: अल्ट बालाजी या ओटीटी प्लॅटफॉर्मवर आक्षेपार्ह (बोल्ड) कंटेट दाखवल्यामुळे निर्माती एकता कपूरला गेल्या काही दिवसांपासून टीकांचा सामना करावा लागतोय. गंदी बात, XXX, बेकाबू, रागिनी एमएमएस 2 यांसारख्या तिच्या सीरिज आणि चित्रपटांना सर्वोच्च न्यायालयानेही फटकारलं. तरुण पिढीला बिघडवण्याचं काम केलं जातंय, असं कोर्टाने एकताला सुनावलं. आता याप्रकरणी एकताने मौन सोडलं आहे. सोशल मीडियावर पोस्ट लिहित तिने अप्रत्यक्षपणे निर्माता-दिग्दर्शक करण जोहरवर निशाणा साधला आहे.

एकताने तिच्या इन्स्टाग्राम स्टोरीमध्ये ही पोस्ट लिहिली आहे. ‘तुम करो तो लस्ट स्टोरीज और हम करे तो गंदी बात’, अशा शब्दांत तिने करण जोहरला सुनावलंय. त्याचसोबत ‘दुटप्पीपणा’ असा हॅशटॅग तिने या पोस्टमध्ये लिहिला आहे.

2020 मध्ये नेटफ्लिक्स या ओटीटी प्लॅटफॉर्मवर ‘लस्ट स्टोरीज’ ही अँथॉलॉजी फिल्म प्रदर्शित झाली होती. यामध्ये चार वेगवेगळ्या दिग्दर्शकांनी दिग्दर्शित केलेल्या कथा दाखवण्यात आल्या होत्या. या चारही कथा महिलांच्या कामुकतेवर भाष्य करणाऱ्या होत्या. यातील एक कथा करण जोहरने दिग्दर्शित केली होती. यावरूनच एकताने करणला अप्रत्यक्षरित्या टोला लगावला आहे.

अल्ट बालाजीवरील ‘XXX’ या सीरिजचं प्रकरण कोर्टापर्यंत पोहोचलं होतं. “यावर काहीतरी उपाय शोधला पाहिजे. तुम्ही या देशाच्या युवा पिढीचा मेंदू दूषित करत आहात. ओटीटीवरील हा कंटेट सर्वांसाठी उपलब्ध आहे. तुम्ही लोकांना कोणता पर्याय देत आहात”, असा सवाल कोर्टाने एकता कपूरला केला होता. या सीरिजमध्ये सैनिकांच्या पत्नीबद्दल आक्षेपार्ह दृश्ये दाखवल्याचा आरोप आहे.