Faisal Khan: आमिर खानला सख्ख्या भावानेच म्हटलं ‘संधीसाधू’; काय आहे वाद?

आमिर खानच्या (Aamir Khan) ‘लाल सिंग चड्ढा’ (Laal Singh Chaddha) या चित्रपटाला बराच विरोध सहन करावा लागला होता. आमिरच्या एका जुन्या वक्तव्यावरुन त्याच्या चित्रपटाला ‘बॉयकॉट’ करण्याची मागणी केली जात होती. सोशल मीडियावरील या नकारात्मक प्रतिक्रियांचा परिणाम चित्रपटाच्या कमाईवरही झाला. आमिरचा लाल सिंग चड्ढा हा चित्रपट बॉक्स ऑफिसवर अपयशी ठरला. सोशल मीडियावर बॉयकॉट ट्रेंड सुरू झाल्याच्या काही काळानंतर आमिरने लोकांची माफी मागितली. त्याच्या माफिनाम्यावर आता धाकटा भाऊ फैजल खानने (Faisal Khan) प्रतिक्रिया दिली आहे.

फैजलने आमिरला संधीसाधू म्हटलं आहे. ‘ई टाइम्स’ला दिलेल्या मुलाखतीत फैजल म्हणाला, “होय, त्याचं माफी मागणं योग्यच होतं. माफी मागून स्वतःला सुधारण्यात काहीच गैर नाही. त्यानंतर तुम्ही एक चांगली व्यक्ती बनता. मात्र आमिरने ही गोष्ट उघडकीस आल्यानंतर लगेचच माफी मागायला हवी होती, त्याचा चित्रपट रिलीज होत असताना नाही. यामुळे तो संधीसाधू असल्यासारखं वाटतं.”

जेव्हा फैजलला विचारण्यात आलं की त्याने लाल सिंग चड्ढा हा चित्रपट पाहिला का, तेव्हा तो म्हणाला, “हो, मी पाहिला आहे. मला वाटतं चित्रपटाचा काही भाग चांगला होता. पण आमिरने यापेक्षा चांगली स्क्रिप्ट निवडायला हवी होती. खासकरून जेव्हा तो चार वर्षांनंतर चित्रपटांमध्ये परतत होता. मला संपूर्ण चित्रपट आवडला नाही, त्यातील काही भागच आवडला. लाल सिंग चड्ढामध्ये ‘वाह’ म्हणण्यासारखं काही नव्हतं.”

फैजल आणि आमिर यांच्या नात्यात एकेकाळी खूप कटुता निर्माण झाली होती. फैजलने आमिरवर अनेक आरोप केले होते. इतकंच नव्हे तर आमिरच्या घरात मला बंदिस्त ठेवण्यात आलं होतं, असंही तो म्हणाला होता.

आमिरसोबत आता नातं कसं आहे असा प्रश्न विचारला असता फैजल म्हणाला, “आम्ही एकमेकांशी बोलतो. कधी कधी आम्ही दोघं भेटतो. पण तो त्याच्या आयुष्यात खूप व्यस्त आहे आणि मी माझ्या व्यस्त जीवनात संघर्ष करत आहे.”