‘जय मल्हार’मध्ये बानू साकारलेली ईशा केसकर आता एका नव्या भूमिकेत

मुंबई | 14 ऑक्टोबर 2023 : ‘जय मल्हार’ या मालिकेत बानुबया, ‘माझ्या नवऱ्याची बायको’मध्ये शनायाची भूमिका साकारून अभिनेत्री ईशा केसकरने प्रेक्षकांच्या मनावर वेगळीच छाप सोडली. आता बऱ्याच महिन्यांनंतर ईशा छोट्या पडद्यावर पुनरागमन करण्यास सज्ज झाली आहे. स्टार प्रवाह वाहिनीवरील ‘लक्ष्मीच्या पाऊलांनी’ या मालिकेतून ईशा प्रेक्षकांच्या भेटीला येणार आहे. यामध्ये ती कला खरे ही भूमिका साकारणार असून तिचा वेगळाच अंदाज चाहत्यांना पहायला मिळणार आहे. ईशाची स्टार प्रवाह वाहिनीसोबत ही पहिलीच मालिका आहे.

या मालिकेविषयी बोलताना ईशा म्हणाली, “सध्या नवरात्रौत्सवाची धूम आहे. या मंगलमय वातावरणात माझ्या नव्या मालिकेचा प्रोमो सोशल मीडियावर प्रदर्शित करण्यात आला आहे. यामध्ये मी कला खरेची भूमिका साकारतेय. नावाप्रमाणेच ती उत्तम कलाकार असते. हातकाम, रंगकला आणि चित्रकलेची तिला फार आवड असते. ती देवीची मूर्ती आणि दागिने घडवते. अंबाबाईच्या देऊळाबाहेर तिचं दागिन्यांचं दुकान असतं. स्वत:च्या हाताने ती सर्व पारंपरिक दागिने घडवते. संपूर्ण कोल्हापूर शहरात तिचे दागिने प्रसिद्ध असतात.”

View this post on Instagram

A post shared by Star Pravah (@star_pravah)

“सर्वसामान्य आयुष्य जगणाऱ्या कलाला गरीब-श्रीमंत असा भेदभाव केलेला आवडत नाही. हे पात्र प्रत्येकाला आपलंसं वाटेल असं आहे. आजवर माझ्या प्रत्येक भूमिकेवर प्रेक्षकांनी भरभरून प्रेम केलं आहे. हेच प्रेम कला आणि आमच्या लक्ष्मीच्या पाऊलांनी मालिकेलाही मिळेल याची मला खात्री आहे. या मालिकेत मला अनेक दिग्गज कलाकारांसोबत काम करण्याची संधी मिळतेय. किशोरी अंबिये माझ्या आईची भूमिका साकारत आहेत. किशोरी ताईंसोबत मी याआधीही काम केलं आहे. या मालिकेसाठी आम्ही कोल्हापुरातल्या अनेक प्रसिद्ध ठिकाणी शूट करत आहोत,” अशा शब्दांत ईशाने भावना व्यक्त केल्या.

ईशाची ही नवीन मालिका येत्या 20 नोव्हेंबरपासून रात्री 9.30 वाजता प्रेक्षकांच्या भेटीला येणार आहे. तर ‘सुख म्हणजे नक्की काय असतं’ ही मालिका आता नव्या वेळेत म्हणजेच रात्री 10 वाजता स्टार प्रवाह वाहिनीवर प्रसारित होणार आहे.