साडेआठ महिन्यांची गरोदर, शूटिंगदरम्यानच सुरू झाल्या प्रसूतीच्या वेदना, कोण आहे ती अभिनेत्री?

Bollywood Actress : बॉलिवूड इंडस्ट्रीमध्ये प्रोफेशनलिझमच्या अनेक कथा ऐकायला मिळतात पण अभिनेत्री नेहा धूपिया हिने नुकताच सांगितलेला अनुभव वेगळ्याच पातळीवरचा आहे. प्रेग्नन्सीच्या अत्यंत नाजूक टप्प्यातही ती सातत्याने काम करत होती आणि शूटिंगदरम्यानच तिला लेबर पेन सुरू झाले असा धक्कादायक खुलासा तिने केला आहे.

चित्रपटसृष्टीत चमकदार पडद्यामागील संघर्ष अनेकदा दिसत नाहीत. मात्र काही वेळा कलाकार स्वतःचे अनुभव सांगून वास्तव समोर आणतात. नेहा धूपिया हिनेही आपल्या प्रेग्नन्सी काळातील अनुभव शेअर करताना सांगितले की, ती साडेआठ महिन्यांची गरोदर असतानाही काम करत होती. ती म्हणाली, मी प्रेग्नन्सीच्या शेवटच्या टप्प्यापर्यंत काम केलं. आई झाल्यानंतरही माझं करिअर थांबू नये आणि मी लवकरच पुन्हा कामावर परतू शकेन अशी माझी इच्छा होती.

सेटवरच सुरू झाले लेबर पेन

नेहा धूपिया अलीकडेच परिणीति चोपड़ा हिच्या ‘Mom Talks’ या टॉक शोमध्ये सहभागी झाली होती. या शोमध्ये सेलिब्रिटी आपल्या पालकत्वाशी संबंधित अनुभव शेअर करतात. या शोमध्ये नेहाने सांगितले की, शूटिंगदरम्यानच एक अनपेक्षित प्रसंग घडला. ती यशराज स्टुडिओ येथे शूटिंग करत असताना अचानक तिला लेबर पेन सुरू झाले. हा अनुभव तिच्यासाठी अत्यंत वेगळा आणि आयुष्यभर लक्षात राहणारा ठरला.

पुढे नेहा म्हणाली, काम करणाऱ्या आईंसाठी सर्वात मोठं आव्हान म्हणजे समाजाच्या अपेक्षा. आई झाल्यानंतर आयुष्य पूर्णपणे बदलायलाच हवं असं नाही. महिलांना त्यांच्या आयुष्याबद्दलचे निर्णय स्वतः घेण्याचा पूर्ण अधिकार आहे. करिअर आणि कुटुंब यांच्यात समतोल साधणं कठीण असलं तरी अशक्य नाही. आजच्या महिला अधिक आत्मनिर्भर आहेत. त्यामुळे त्यांना समाजाकडूनही साथ मिळणं गरजेचं आहे असं ती म्हणाली.

वैयक्तिक आयुष्य

नेहा धूपिया हिने 10 मे 2018 रोजी अभिनेता अंगद बेदी याच्याशी लग्न केले. या दाम्पत्याला दोन मुले आहेत. मुलगी मेहर आणि मुलगा गुरिक. नेहा सोशल मीडियावर कुटुंबासोबतचे क्षण नेहमी शेअर करत असते. नेहा धूपियाचा हा अनुभव केवळ एक वैयक्तिक किस्सा नसून कामकाजी महिलांच्या जिद्दीचा आणि आत्मविश्वासाचा प्रेरणादायी नमुना ठरतो.