Govida : गोविंदापासून फक्त हीच वाचू शकली..; मराठमोळ्या अभिनेत्रीबद्दल हे काय बोलून गेली सुनिता?
Sunita Ahuja Govinda Divorce: अभिनेता गोविंदाची पत्नी सुनिता अहुजा अत्यंत मनमोकळ्या स्वभावासाठी ओळखली जाते. मनात काहीच न ठेवता ती बेधडकपणे वक्तव्ये करताना दिसते. नुकत्याच एका शोमध्ये तिने एका प्रसिद्ध मराठमोळ्या अभिनेत्रीबद्दल टिप्पणी केली.
Sunita Ahuja Govinda Divorce: अभिनेता गोविंदा आणि त्याची पत्नी सुनिता अहुजा यांच्या संसारात फूट पडल्याच्या चर्चा गेल्या काही महिन्यांपासून आहेत. सुनिताने गोविंदाला घटस्फोट देण्यासाठी कोर्टात अर्ज दाखल केल्याचंही म्हटलं गेलं होतं. परंतु गणेशोत्सवादरम्यान जेव्हा या दोघांना पुन्हा एकत्र पाहिलं गेलं, तेव्हा विभक्त होण्याच्या चर्चांना काही काळासाठी का होईना, पूर्णविराम मिळाला आहे. यादरम्यान सुनिताने नुकतीच ‘पती पत्नी और पंगा 2’ या शोमध्ये हजेरी लावली. या शोमध्ये अभिनेत्री सोनाली बेंद्र परीक्षकाच्या भूमिकेत आहे. तिला पाहताच गोविंदाच्या पत्नीने अशी टिप्पणी केली, जे ऐकून सर्वांच्याच भुवया उंचावल्या होत्या.
सुनिता ‘पती पत्नी और पंगा 2’ या शोमध्ये पाहुणी म्हणून पोहोचली होती. यावेळी सूत्रसंचालक मुनव्वर फारुकीने सुनिताला स्टेजवर डान्स करण्यासाठी बोलावलं. तेव्हा सुनिता मुनव्वरला म्हणाली, “मी तुझी बीवी नंबर 1 नाहीये, जे तू माझ्यासोबत डान्स करतोय.” सुनिता तिच्या बेधडक स्वभावासाठी ओळखली जाते. यामुळे अनेकदा ती सोशल मीडियावर चर्चेत येते. शोमध्ये पुढे ती म्हणते, “या शोमध्ये येऊन मी माझ्या जुन्या आठवणींमध्ये रमून गेली. ज्या आठवणी आनंदाने भरलेल्या आहेत. मला गोविंदाच्या गाण्यावर नाचायला खूप आवडतं. सोनालीसोबत आणि या इतर जोडप्यांसोबत स्टेज शेअर करून मला खूप छान वाटलं.”
View this post on Instagram
शोमध्ये सोनालीसोबत वेळ घालवणं ही गोष्ट अत्यंत खास असल्याचीही भावना सुनिताने व्यक्त केली. “आम्ही दोघांनी बऱ्याच गप्पा मारल्या आणि जुन्या गोष्टींवरून खूप हसलो. गोविंदाने तसं तर सर्वच सौंदर्यवर्तींसोबत फ्लर्ट केलंय. फक्त सोनालीच त्याच्यापासून वाचली. ही अशी एकमेव अभिनेत्री आहे, जिच्यासोबत गोविंदाने फ्लर्ट केलं नाही”, असं सुनिता म्हणताच सर्वजण हसू लागतात. सुनिता आणि गोविंदा यांनी 1987 मध्ये लग्न केलं. तर 1994 मध्ये गोविंदा आणि सोनाली यांनी ‘आग’ या चित्रपटात एकत्र काम केलं होतं. या दोघांचा ‘जिस देश में गंगा रहता है’ हा चित्रपटसुद्धा चांगलाच गाजला होता.
घटस्फोटाच्या चर्चांदरम्यान सुनिताने तिच्या इन्स्टाग्राम हँडलवरून अहुजा हे आडनाव काढून टाकलं होतं. डिसेंबर 2024 मध्ये सुनिताने वांद्रे कोर्टात घटस्फोटाचा अर्ज दाखल केला होता, असं वृत्त ‘हॉटरफ्लाय’ या वेबसाइटने दिलं होतं. यावेळी तिने गोविंदावर व्यभिचार, क्रूरता असे गंभीर आरोप केले होते.
