डोनाल्ड ट्रम्प यांना जबर हादरा, बड्या देशाने दाखवला ठेंगा; ऐन युद्धात चिंता वाढली

इराण आणि अमेरिका यांच्यात गेल्या एका महिन्यापासून भीषण युद्ध सुरू आहे. दोन्ही बाजूंनी एकमेकांवर भीषण हल्ले होत आहेत. अशातच आता आणखी एका देशाने अमेरिकेला जबर दणका दिला आहे. मध्यपूर्वेकडे जाणाऱ्या एका विमानाला इटलीने सिसिलीमध्ये उतरण्याची परवानगी नाकारली आहे. स्थानिक वृत्तपत्र कोरिएरे डेला सेराने याबाबत वृत्त दिले आहे. समोर आलेल्या माहितीनुसार, इटलीने स्वतःला इराण युद्धापासून दूर ठेवण्यासाठी हा निर्णय घेतला आहे. युद्ध सुरू झाल्यापासून जॉर्जिया मेलोनी यांच्या सरकारने डोनाल्ड ट्रंप यांच्या सरकारविरूद्ध घेतलेला हा पहिलाच निर्णय आहे. यामुळे अमेरिकेला मोठा धक्का बसला आहे. याबाबत सविस्तर माहिती जाणून घेऊयात.

इटलीच्या निर्णयामुळे अमेरिकेला फटका

समोर आलेल्या माहितीनुसार, इटली सरकारने सिसिलीमध्ये अमेरिकन विमानांना लँडिंगची परवानगी नाकारली आहे. त्यामुळे या भागातील अमेरिकेच्या लष्करी कारवायांवर परिणाम होण्याची शक्यता आहे. कारण सिसिली मध्यपूर्वेतील मोहिमांसाठी धोरणात्मकदृष्ट्या महत्त्वाचे ठिकाण आहे. एक दिवस आधी स्पेननेही अमेरिकन विमानांसाठी आपले हवाई क्षेत्र बंद केले होते. आता इटलीनेही लँडिंगची परवानगी नाकारली आहे. त्यामुळे या युद्धाला इटलीचा अमेरिकेला पाठिंबा नसल्याचे समोर आले आहे.

अमेरिका इटली मैत्री तुटली?

इटलीचा हा निर्णय अधिक महत्त्वाचा आहे, कारण इटली हा देश नाटोचा सदस्य आहे. युरोपमध्ये इटलीचा मोठा प्रभाव आहे. तसेच इटलीच्या पंतप्रधान जॉर्जिया मेलोनी आणि अमेरिकेचे राष्ट्राध्यक्ष डोनाल्ड ट्रंप हे एकमेकांच्या जवळचे मानले जाते. मेलोनी या युरोपमधील एकमेव प्रमुख नेत्या होत्या, ज्यांना ट्रंप यांनी त्यांच्या शपथविधी सोहळ्यात व्हाइट हाऊसमध्ये आमंत्रित केले होते. याआधी अनेकदा मेलोनी यांनी ट्रंप यांना पाठिंबा दिला आहे. मात्र आता युद्धाच्या काळात विमान उतरण्यास नकार दिल्याने दोन्ही देशांमधील मैत्री तुटल्याचे समोर आले आहे.

इटलीने हा निर्णय का घेतला?

इटलीने अद्याप अधिकृतरीत्या या निर्णयावर भाष्य केलेले नाही. मात्र, हा निर्णय नुकत्याच झालेल्या जनमत चाचणीशी जोडला जात आहे. या चाचणीत मेलोनी यांच्या पक्षाला मोठा पराभव पत्करावा लागला होता. इराण युद्धामुळे पक्षाला हा फटका बसल्याचे बोलले जात आहे. सर्वेक्षणांत असे दिसून आले की, ट्रंप यांच्याशी मेलोनी यांच्या जवळिकीमुळे इटलीतील अनेक लोक नाराज आहेत. इराण युद्धामुळे देशात आर्थिक अडचणी निर्माण होण्याची भीती आहे. तसेच इटलीमध्ये पुढील वर्षी निवडणूक होणार आहे, त्यामुळे ही निवडणूक डोळ्यासमोर ठेवून मेलोनी सरकारने अमेरिकन विमानांना उतरण्याची परवानगी नाकारली आहे.