क्रांतीची मशाल पेटवणाऱ्या महिलेपुढे चिनी सरकार हादरलं, काई शिया यांनी जिनपिंग विरोधात बंड पुकारलं

काई शिया या त्याच महिला आहेत ज्यांनी जिनपिंग यांच्या अमर्याद सत्तेला आव्हान दिलं आहे.

Nupur Chilkulwar | Updated on: Aug 21, 2020 | 12:06 AM

बिजिंग : ”हम करे सो कायदा” म्हणणाऱ्या जिनपिंग यांच्या देशात क्रांतीची ठिणगी (China Cai Xia Vs Xi Jinping) पडत आहे. जिनपिंग यांचा नायकाच्या वेशातला खलनायकाचा चेहरा हळूहळू समोर येऊ लागला आहे. कारण, क्रांतीची मशाल पेटवणाऱ्या एका महिलेपुढे चिनी सरकार हादरलं आहे. त्याच महिलेच्या नेतृत्वात चीन नव्या बदलाचे स्वप्न पाहतो आहे (China Cai Xia Vs Xi Jinping).

काई शिया या त्याच महिला आहेत ज्यांनी जिनपिंग यांच्या अमर्याद सत्तेला आव्हान दिलं आहे. कधी काळी काई शिया या जिनपिंग यांच्या मर्जीतल्या होत्या. जिनपिंग यांचा आदेश काई शिया यांच्यासाठी सुद्धा शिरसावंद्य होता. चीन सरकारच्या अनेक पापांच्या काई शिया या स्वतः साक्षीदार राहिल्या आहेत. मात्र आता पाणी डोक्यापार गेल्यामुळे त्यांनी बंडाचा झेंडा फडकवला आहे.

काई शिया व्यवसायाने प्राध्यापक आहेत. अधिकाऱ्यांच्या ट्रेनिंगसाठी चीनमध्ये एक स्वतंत्र पक्षाचं सेंटर आहे. त्याच सेंटरमध्ये काई शिया अधिकाऱ्यांना ट्रेनिंग देतात. त्याआधी कम्युनिस्ट पक्षात काई शिया मोठ्या नेत्या मानल्या जायच्या.

काई शिया यांनी जून महिन्यात एक मुलाखत दिली होती. मात्र, जिनपिंग सरकारने तो प्रसारित होऊ दिला नाही. मात्र, 17 ऑगस्टला तिच मुलाखत सोशल मीडियात लीक होताच चीनच्या कम्युनिस्ट पार्टीत खळबळ उडाली. ती मुलाखत म्हणजे जिनपिंग यांच्या जुलमी कारभाराचा अध्यायच आहे (China Cai Xia Vs Xi Jinping).

काई शिया यांनी मुलाखतीत जिनपिंग यांच्यावर अनेक गंभीर आरोप केले आहेत. “जिनपिंग हेच चीनच्या विकासातले खरे अडसर आहेत. जिनपिंग यांच्यामुळे चीन साऱ्या जगाचा शत्रू बनला आहे. फक्त मीच नाही, तर अर्धा कम्युनिस्ट पक्ष फुटण्याच्या मार्गावर आहे. शेकडो लोकांना पक्ष सोडण्याची इच्छा आहे, मात्र जिनपिंग यांनी सदस्यांना धमकावणं सुरु केलं आहे. पक्षातले सर्व निर्णय फक्त जिनपिंगच घेतायत, इतर कुणाचा शब्दही ऐकला जात नाही”, असे आरोप काई शिया यांनी केले आहेत.

चीनमध्ये जिनपिंग यांच्याविरोधात उठणार आवाज दाबला जातो. पत्रकार गायब होतात, सामाजिक कार्यकर्त्यांची हत्या होतात आणि बंडखोर नेत्यांना तुरुंगात डांबलं जातं. फेब्रुवारीत सुद्धा असाच एक आवाज उठला. चाईनीज मार्शल आणि प्रसिद्ध सामाजिक कार्यकर्ते शि जियोंग यांनी जिनपिंग यांनाच चीनचा गुन्हेगार म्हटलं. मात्र, त्याच्याच दुसऱ्याच दिवशी ते तुरुंगात होते. त्या अटकेविरोधात लोकांचा निदर्शनं सुद्धा केली. मात्र, ते आंदोलन सुद्धा दडपलं गेलं.

काई शिया यांचं बंड कदाचित दाबलं जाईल. मात्र, त्यांच्या एका मुलाखतीने 140 कोटीच्या चीनमध्ये चर्चा सुरु झाली. चिनी जनतेतल्या उद्रेकाला हवा दिली. काही मिनिटांची त्यांची मुलाखत जिनपिंग यांच्या वर्षानुवर्षाच्या पापांचा पाढाच आहे. चीन भलेही सीमेवर युद्धसराव करत असेल, पण त्यांचा स्वतःचा देशच कधीही युद्धभूमीत बदलू शकतो. कारण, जिनपिंग यांच्या जुलमी कारभारानं त्यांच्याच जनतेच्या मनात बंडखोरीचे सुरुंग पेरुन ठेवले आहेत.