नक्षलवाद्यांशी लढणाऱ्या पोलिसांना नवी उमेद, दिवाळीत पहिल्यांदाच गृहमंत्री थेट दुर्गम भागात
गृह मंत्री अनिल देशमुख यांनी सपत्नीक नक्षलवादी हिंसाचाराविरोधात लढणाऱ्या गडचिरोली जिल्ह्यातील अत्यंत दुर्गम भागाला दिवाळीनिमित्त भेट दिली.
गडचिरोली : गृह मंत्री अनिल देशमुख यांनी सपत्नीक नक्षलवादी हिंसाचाराविरोधात लढणाऱ्या गडचिरोली जिल्ह्यातील अत्यंत दुर्गम भागाला दिवाळीनिमित्त भेट दिली. तसेच पोलीस जवानांची उमेद वाढवली. देशमुख यांनी शनिवारी (14 नोव्हेंबर) लक्ष्मी पुजनाच्या दिवशी गडचिरोलीपासून 300 किलोमीटर अंतरावर असलेल्या पातागुडमला भेट देऊन जवानांसोबत दिवाळी साजरी केली (Home Minister Anil Deshmukh celebrate Diwali with Police in Gadchiroli).
शनिवारी दुपारी अडीच वाजण्याच्या सुमारास अनिल देशमुख आणि त्यांच्या पत्नी आरती देशमुख हेलीकॉप्टरने पातागुडम येथे पोहोचले. या वेळी गडचिरोली परिक्षेत्राचे पोलीस उपमहानिरिक्षक संदीप पाटील, गडचिरोलीचे पोलीस अधीक्षक अंकित गोयल, अतिरिक्त पोलीस अधीक्षक मनीष कलवनिया, सिरोंचा विभागाचे प्रांत अधिकारी प्रशांत स्वामी उपस्थित होते.
दिवाळीच्या निमित्ताने प्रथमच गृहमंत्री येत असल्याने पोलिसांमध्ये उत्साहाचे वातावरण होते. गृह मंत्र्यांनी यावेळी येथील पोलिसांशी संवाद साधला. नक्षलवाद्यांशी लढताना शहीद झालेल्या पोलिसांच्या कुटुंबियांची आस्थेने चौकशी केली. या भागामध्ये दौंड आणि कोल्हापूर येथील राज्य राखीव पोलीस बलाच्या तुकड्या कार्यरत आहेत. त्यांचे गृह मंत्र्यांनी विशेष कौतुक केले.
यावेळी बोलताना अनिल देशमुख म्हणाले, “भावनेपेक्षा कर्तव्याला प्राधान्य देणाऱ्या जवानांना दिवाळीचा आनंददायी सण कुटुंब व मित्रांसोबत साजरा करायला मिळत नाही. गडचिरोलीसारख्या दुर्गम भागात पोलीस घरापासून, आपल्या आई-वडिलांपासून, भावंडांपासून, पत्नी-मुलाबाळांपासून दूर आहेत याची मला जाणीव आहे. तेव्हा पोलीस दलाचा कुटुंबप्रमुख म्हणून मला मनापासून वाटलं की मी तुमच्यात यायला हवं.”
“माझं पोलीस दल ड्युटीवर असताना मी माझ्या घरात, माझ्या पत्नी-मुलांसमवेत दिवाळी साजरा करत बसलो असतो, तर माझ्या मनाला रुखरुख लागली असती. म्हणून ठरवलं की तुमच्याकडं यायचं आणि काही वेळ तरी तुमच्या सोबत घालवायचा,” असंही देशमुख यांनी नमूद केलं.
पोलीस दलाचा कुटुंबप्रमुख म्हणून त्यांच्यासोबत दिवाळी साजरी करत त्यांच्या कर्तव्यनिष्ठेचे कौतुक केले. तसेच उपस्थितांना दीपावलीच्या मनःपूर्वक शुभेच्छा दिल्या. यावेळी गडचिरोली पोलीस दलातील पोलीस अधिकारी, अंमलदार व त्यांचे कुटुंबीय उपस्थित होते.(२/२)@SP_GADCHIROLI pic.twitter.com/4Rja9eoHkM
— ANIL DESHMUKH (@AnilDeshmukhNCP) November 14, 2020
गडचिरोली पोलीस क्षेत्राचे उपमहानिरिक्षक संदीप पाटील म्हणाले, “या ठिकाणी कार्यरत असणाऱ्या पोलीस कर्मचाऱ्यांची राहण्याची व्यवस्था बराकमध्ये केली आहे. त्यामुळे त्यांना आपल्या कुटुंबियांसमवेत राहता येत नाही. गृह मंत्र्यांनी हा प्रश्न तातडीने सोडविण्याचे आश्वासन दिले.” पोलिसांच्या इतर अडचणी समूजन घेत सरकार सदैव पोलीस दलाच्या पाठीशी असल्याची ग्वाही देशमुख यांनी दिली.
‘गृह मंत्र्यांच्या ऐतिहासिक भेटीने पोलीस कर्मचारी भारावले’
गडचिरोलीतील अत्यंत दुर्गम आणि टेकड्यांचा प्रदेश असलेल्या पातागुडम येथे गृह मंत्री अनिल देशमुख यांनी दिलेल्या ऐतिहासिक भेटीने पोलीस कर्मचारी भारावून गेले. येथील महिला पोलीस कर्मचाऱ्यांची देशमुख दाम्पत्याने आस्थेने विचारपूस केली. त्यांच्या अडचणी जाणून घेतल्या. हे ठिकाण गडचिरोली पोलीस मुख्यालयापासून 300 किलोमीटर अंतरावर छत्तीसगढ सीमेलगत आहे.
संबंधित बातम्या :
पोलीस दलाच्या संवेदनेने जगण्याचे बळ मिळाले; गृहमंत्र्यांच्या पत्राने ‘त्या’ पोलिसाचे कुटुंबीय भावुक
Home Minister Anil Deshmukh celebrate Diwali with Police in Gadchiroli
