पुणे तिथे काय उणे… पुण्यात आंबे खाण्याची स्पर्धा

पुणे : आंबा हा लहान मुलांपासून मोठ्या माणसांपर्यंत सर्वाचं आवडत फळ. उन्हाळ्याची सुरुवात झाली की प्रत्येकाला आंबे खाण्याचे वेध लागतात. असे हे चवदार, रसाळ, पिवळेधम्मक हापूस आंबे खाण्याची स्पर्धा झाली तर? काय मजा येईल ना… मोठ्या माणसांप्रमाणे लहान मुलांनाही आंब्यावर ताव मारण्याचा मनमुराद आनंद लुटता यावा यासाठी पुण्यातील एका संस्थेने आंबे खाण्याची अनोखी स्पर्धा आयोजित केली आहे.

पुणे तिथे काय उणे अशी उपमा पुणे शहराला दिली जाते. याच शहरातील महाराष्ट्र माझा या संस्थेच्यावतीने अनोख्या आंबे खाण्याच्या स्पर्धेचे आयोजन केले आहे. कोकणातील हापूस आंब्याच्या जनजागृतीच्या निमित्ताने पुण्यातील बालगंधर्व नाट्यगृहात ही स्पर्धा पार पडणार आहे. अवघ्या दोन मिनिटात तीन आंबे खाण्याची ही स्पर्धा असणार आहे. या स्पर्धेत पाच ते दहा वयोगटातील लहान मुलांना सहभाग घेता येणार आहे. या स्पर्धेच्या निमित्ताने थेट शेतकरी ते ग्राहक आंबा विक्री केली जाते.

फळांचा राजा म्हणून ओळख असलेल्या आंब्याची चव लहान मुलांना चाखता यावी, यासाठी दरवर्षी ही स्पर्धा आयोजित केली जाते. या स्पर्धेच्या निमित्ताने रसाळ, चवदार, पिवळेधम्मक हापूस आंबे इवल्याशा हातांमध्ये पकडण्याची कसरत लहान मुलांमध्ये पाहायला मिळणार आहे. तसेच या स्पर्धेच्या निमित्ताने तल्लीन होऊन आंबे खाणारे चिमुकले आणि स्पर्धा जिंकण्यासाठी आंबा खाण्यासाठी मारलेला ताव असे चित्र लवकरच पुणेकरांना पाहायला मिळणार आहे.