‘हैदराबादला भाग्यनगर बनवायला आलो आहे’, ओवेसींचा गड असलेल्या हैदराबादेत योगी आदित्यनाथांची गर्जना

ग्रेटर हैदराबाद महानगरपालिका निवडणुकीत भाजपनं आपली पूर्ण ताकद पणाला लावली आहे. जे.पी. नड्डा, योगी आदित्यनाथ यांच्यासह केंद्रीय गृहमंत्री अमित शाह हे देखील प्रचाराच्या मैदानात उतरणार आहेत. भाजप यूवा मोर्चाचे अध्यक्ष तेजस्वी सूर्या हे देखील हैदराबादेत तळ ठोकून आहेत.

sagar joshi | Updated on: Nov 28, 2020 | 7:36 PM

हैदराबाद: ग्रेटर हैदराबाद महानगरपालिका निवडणुकीचं मैदान चांगलंच तापली आहे. या निवडणुकीत भाजप पूर्ण ताकदीनिशी उतरल्याचं पाहायला मिळत आहे. भाजपाध्यक्ष जे. पी. नड्डा यांच्या हैदराबाद दौऱ्यानंतर आता उत्तर प्रदेशचे मुख्यमंत्री योगी आदित्यनाथ यांनी मल्काजगीरी इथं रोड शो केला. त्यावेळी आपण हैदराबादला भाग्यनगर बनवायला आलो आहोत, असं वक्तव्य केलं. त्यामुळे हैदराबादेतील राजकारण आता चांगलंच तापल्याचं पाहायला मिळत आहे.(Uttar Pradesh cm yogi adityanath on Hyderabad municipal corporation election)

ग्रेटर हैदराबाद महानगरपालिका निवडणुकीत भाजपनं आपली पूर्ण ताकद पणाला लावली आहे. जे.पी. नड्डा, योगी आदित्यनाथ यांच्यासह केंद्रीय गृहमंत्री अमित शाह हे देखील प्रचाराच्या मैदानात उतरणार आहेत. भाजप यूवा मोर्चाचे अध्यक्ष तेजस्वी सूर्या हे देखील हैदराबादेत तळ ठोकून आहेत.

उत्तरप्रदेशचे मुख्यमंत्री योगी आदित्यनाथ यांच्या हैदराबाद दौऱ्यापूर्वी MIM चे नेते खासदार असदुद्दीन ओवेसी आणि त्यांचे बंधू अकबरुद्दीन ओवेसी यांनी भाजपवर जोरदार निशाणा साधला आहे. ‘भाजप सर्जिकल स्ट्राईक करेल तर जनता 1 डिसेंबरला डेमोक्राटिक स्ट्राईक करेल’, अशी टीका असदुद्दीन ओवेसी यांनी केलीय. तर ‘आम्ही ना योगींना घाबरू, ना चहा वाल्यांना, या देशावर जेवढा मोदींचा अधिकार आहे, तेवढाच अकबरुद्दीनचाही आहे’, असं वक्तव्य अकबरुद्दीन ओवेसी यांनी केलं आहे.

भाजपकडून विधानसभेची तयारी

ग्रेटर हैदराबाद महानगरपालिका निवडणुकीत चार प्रमुख पक्ष निवडणुकीच्या मैदानात उतरले आहेत. त्यात TRS, MIM, काँग्रेस आणि भाजपचा समावेश आहे. मात्र, मुख्य लढत ही भाजप आणि MIM मध्ये सुरु असल्याचं चित्र पाहायला मिळत आहे.

तेलंगनामध्ये तेलंगण राष्ट्र समिती मजबूत असली तरी चंद्राबाबू नायडू यांच्यावर लोकांची नाराजी पाहायला मिळतेय. तर इथं काँग्रेस कमजोर आहे. हैदराबादेत भाजप ओवेसींची ताकद कमी करण्यात यशस्वी ठरली तर विधानसभा निवडणुकीत भाजपला त्याचा मोठा फायदा होईल, अशी शक्यता वर्तवली जात आहे.

मोदी है तो मुमकीन हैं : योगी आदित्यनाथ

‘बिहार विधानसभा ते पोटनिवडणुका, मोदी है तो मुमकीन हैं’, अशा शब्दात योगी आदित्यनाथ यांनी बिहार विधानसभा निकाल आणि विविध राज्यांत पार पडलेल्या पोटनिवडणुकांच्या निकालाचं वर्णन केलं. “देशाच्या विविध कानाकोपऱ्यातील जनतेला पंतप्रधान नरेंद्र मोदी यांच्यावर आणि त्यांच्या उत्तुंग कामावर विश्वास आहे. त्यांचं काम जनतेच्या मनात आहे. त्याचमुळे या निवडणुकीत जनतेने पुन्हा एकदा भाजपाल पसंती दिली”, असं योगी आदित्यनाथ म्हणाले.