अजितदादांच टेन्शन वाढलं; सांगलीमधून मोठी बातमी, संजय काका पाटलांना धक्का

विधानसभा निवडणुकीचं वारं आता जोरात वाहू लागलं आहे. प्रचाराला देखील वेग आलाय. त्यातच सांगलीच्या राजकीय वर्तुळातून मोठी बातमी समोर येत आहे. ती म्हणजे राष्ट्रवादी शरद पवार गटाचे उमेदवार रोहित पाटील यांना राजू शेट्टी यांच्या स्वाभिमानी शेतकरी संघटनेनं पाठिंबा जाहीर केला आहे. एवढंच नाही तर स्वाभिमानी शेतकरी संघटनेकडून रोहित पाटील यांचा प्रचार देखील करण्यात येणार आहे. रोहित पाटील हे राष्ट्रवादी शरद पवार गटाकडून सांगलीच्या तासगाव-कवठेमहांकाळ विधासभा मतदारसंघातून निवडणूक लढवत आहेत, तर त्यांच्याविरोधात राष्ट्रवादी अजित पवार गटाकडून माजी खासदार संजय पाटील यांना उमेदवारी देण्यात आली आहे.

सांगलीच्या तासगाव-कवठेमहांकाळ मधील राष्ट्रवादी शरद पवार गटाचे उमेदवार रोहित आर आर पाटील यांना राजू शेट्टी यांच्या स्वाभिमानी शेतकरी संघटनेने पाठिंबा दिला आहे. सांगली जिल्हा अध्यक्ष महेश खराडे यांनी हा पाठिंबा जाहीर केला आहे. रोहित पाटील यांच्या उपस्थितीमध्ये झालेल्या सभेमध्ये स्वाभिमानी शेतकरी संघटनेकडून रोहित पाटील यांना पाठिंबा देत असल्याचं महेश खराडे यांनी जाहीर केलं. एवढंच नाही तर  तासगाव कवठेमहांकाळ मतदार संघामध्ये स्वाभिमानी शेतकरी संघटनेकडून रोहित पवार यांचा प्रचार देखील करण्यात येणार आहे.

राष्ट्रवादी अजित पवार गटाला धक्का 

दरम्यान या विधानसभा मतदारसंघात दोनही राष्ट्रवादीचेच उमेदवार आहेत. राष्ट्रवादी शरद पवार गटाकडून रोहित पाटील तर राष्ट्रवादी अजित पवार गटाकडू संजय पाटील यांना उमेदवारी देण्यात आली आहे. आता स्वाभिमानी शेतकरी संघटनेकडून रोहित पाटील यांना पाठिंबा देण्यात आल्यामुळे या मतदारसंघात रोहित पाटील यांची ताकत वाढल्याची चर्चा आहे., मात्र दुसरीकडे स्वाभिमानी शेतकरी संघटनेचा रोहित पाटील यांना असलेला पाठिंबा हे संजय पाटील यांच्यासाठी मोठं आव्हान ठरू शकतं. या मतदारसंघातून एकूण 23 उमेदवार रिंगणात आहेत, त्यापैकी दहा उमेदवारांनी विविध पक्षांच्या वतीनं अर्ज दाखल केला आहे तर तेरा उमेदवार हे अपक्ष निवडणूक लढवत आहेत.