Maharashtra Election News LIVE : मनसेचे मुंबईतील उमेदवार राज ठाकरेंच्या भेटीला

मुंबईतल्या हिंदू बांधवांनी विचार करावा… मुंबईतला हिरवा साप वारिस पठाण धमक्या देतोय की मुंबईचा महापौर खान पठाण अब्दुल किंवा बुरखावाली महिला पण बनू शकतो… तेव्हा ठाकरे गटातून कोणाला काही मिरची लागली का ? कोणी बिळातून बाहेर आलं का ? पण कृपाशंकर सिंग जेव्हा उत्तर भारतीयांबद्दल बोलले तेव्हा हे सगळे बिळातून बाहेर आले… ह्या लोकांनी हिंदूमध्ये फुट पाडण्याची सुपारी घेतली आहे.. मुंबईचा महापौर हा मराठीच होणार आणि तो हिंदूच होणार आणि तो आमचाच होणार… असं वक्तव्य नितेश राणे यांनी केलं आहे.

बीड जिल्ह्यातील पाटोदा तालुक्यातील भायाळा येथील राख कुटुंबातील सदस्यांना झालेल्या मारहाणीच्या निषेधार्थ आज वैद्यकिन्ही टोलनाक्यावर तीव्र रस्ता रोको आंदोलन करण्यात येत आहे. तीन दिवसांपूर्वी आमदार सुरेश धस यांच्या कार्यकर्त्यांच्या मालकीच्या असलेल्या या टोलनाका चालकांकडून मारहाण झाल्याचा आरोप पीडित कुटुंबाने केला आहे. या प्रकरणी दोषींवर अद्याप कोणतीही कठोर कारवाई न झाल्याने ग्रामस्थ आणि पीडित कुटुंबीयांनी आक्रमक पवित्रा घेत टोलनाक्याजवळच ठिय्या मांडला आहे. जोपर्यंत मारहाण करणाऱ्यांवर कडक कारवाई होत नाही, तोपर्यंत मागे हटणार नाही असा पवित्रा आंदोलकांनी घेतल्याने महामार्गावरील वाहतूक विस्कळीत झाली असून परिसरात तणावाचे वातावरण आहे.

नाशिक भाजपमधील अंतर्गत कलह आता चव्हाट्यावर आला असून पक्षाचे शहर सरचिटणीस अमित घुगे यांनी तिकीट वाटपावरून थेट बंडाचे निशाण फडकवले आहे. तिकीट वाटपामध्ये मोठ्या प्रमाणावर आर्थिक व्यवहार झाल्याचा गंभीर आरोप घुगे यांनी केला आहे. या गोंधळाचा पर्दाफाश करण्यासाठी त्यांनी पत्रकार परिषद बोलावली आहे. अमित घुगे हे गेल्या अनेक वर्षांपासून पक्षाचे निष्ठावान कार्यकर्ते म्हणून ओळखले जातात, मात्र त्यांच्याच आरोपांमुळे भाजपच्या गोटात मोठी खळबळ उडाली आहे. कालच बडगुजर आणि शहाणे यांना एकाच जागेसाठी दोन ‘एबी’ फॉर्म दिल्याने पक्षात गोंधळ निर्माण झाला होता, त्यातच आता शहर सरचिटणीसांनी उघड नाराजी व्यक्त केल्याने नाशिक भाजपमधील वाद विकोपाला गेला आहे.

वसई-विरार महानगरपालिका निवडणुकीसाठी महायुतीने कंबर कसली असून, आज प्रचाराचा अधिकृत शुभारंभ होणार आहे. भाजपचे प्रदेशाध्यक्ष रवींद्र चव्हाण यांच्या हस्ते आज संध्याकाळी ४ वाजता वसईतील वाय.एम.सी. (YMC) मैदानावर भव्य कार्यकर्ता मेळाव्याचे आयोजन करण्यात आले आहे. या मेळाव्याच्या माध्यमातून महायुतीच्या प्रचाराचा नारळ फोडला जाणार असून, रवींद्र चव्हाण उपस्थित कार्यकर्त्यांना मार्गदर्शन करणार आहेत. महायुतीने या निवडणुकीत ११५ उमेदवार रिंगणात उतरवले असून, बहुजन विकास आघाडीच्या बालेकिल्ल्यात सुरुंग लावण्यासाठी भाजपने जोरदार रणनीती आखली आहे. या मेळाव्यामुळे वसई-विरारमधील राजकीय वातावरण तापण्याची शक्यता आहे.

पुणे जिल्ह्यातील जुन्नर तालुक्यातील ओतूर येथे अहिल्यानगर-कल्याण महामार्गावर आज एक हृदयद्रावक अपघात घडला. शेतमजुरांना घेऊन जाणाऱ्या पिकअप वाहनाला आणि ट्रकची समोरासमोर जोरदार धडक बसली. हा अपघात इतका भीषण होता की, यामध्ये दोन महिला शेतमजुरांचा जागीच मृत्यू झाला असून १५ ते २० मजूर गंभीर जखमी झाले आहेत. अपघातातील जखमींना तातडीने ओतूर आणि आळेफाटा येथील खासगी रुग्णालयांत उपचारासाठी दाखल करण्यात आले आहे. या घटनेमुळे परिसरात हळहळ व्यक्त केली जात असून महामार्गावरील वाहतुकीवरही याचा परिणाम झाला होता.

जालना महानगरपालिका निवडणुकीच्या तोंडावर शिवसेना आणि भाजपची युती तुटल्याने राजकीय वर्तुळात मोठी खळबळ उडाली आहे. या घडामोडीवर भाष्य करताना आमदार अर्जुन खोतकर यांनी भाजपच्या वरिष्ठ नेतृत्वावर गंभीर आरोप केले आहेत. भाजपच्या वरिष्ठ नेत्यांकडे चुकीची माहिती पोहोचवण्यात आली, ज्यामुळे त्यांचा गैरसमज झाला. इतिहासात पहिल्यांदाच एवढ्या मोठ्या प्रमाणावर वरच्या पातळीवरून हस्तक्षेप झाल्याने सकारात्मक चर्चा होऊनही युती दुभंगली,” असे खोतकर म्हणाले. युती तुटली असली तरी, आता आगामी काळात जालना महानगरपालिकेवर महापौर आणि जिल्हा परिषदेवर आपला अध्यक्ष बसवणे हाच आमचा मुख्य संकल्प असल्याचे त्यांनी ठामपणे सांगितले.

राजकारणाचे गुन्हेगारीकरण आणि अजित पवार यांच्यावर टीका अजित पवार यांनी गुन्हेगारी पार्श्वभूमी असलेल्यांना उमेदवारी दिल्यावरून सुषमा अंधारे यांनी जोरदार निशाणा साधला. ढवळ्या शेजारी पवळ्या बांधला, वाण नाही पण गुण लागला, असा टोला लगावला. भाजपामध्ये आधीच तडीपार आणि गुन्हेगार आले आहेत. आता भाजपसोबत आपणही गुन्हेगारांना निवडून आणू शकतो, अशी खात्री वाटू लागल्यानेच राजकारणाचे गुन्हेगारीकरण सुरू झाले आहे. पोलीस यंत्रणेवर दबाव असून, उमेदवारांना अभय देण्यासाठी खुद्द उपमुख्यमंत्रीच सरसावले असतील, तर पोलिसांना दोष देणे चुकीचे आहे. या सर्व प्रकाराचे श्रेय अजित पवार आणि देवेंद्र फडणवीस यांनाच जाते, असे सुषमा अंधारे म्हणाल्या.

संभाजी ब्रिगेडतर्फे इअर एंड आणि नवीन वर्षानिमित्त अनोखा उपक्रम राबविण्यात आला. बार्शीतील वैरागमध्ये 31 डिसेंबरला दारू नको, दूध प्या असा संदेश देणारा उपक्रम राबविण्यात आला. वैराग इथं संभाजी ब्रिगेडतर्फे 1 हजार लीटर दुधाचं मोफत वाटप करण्यात आलं.

नाराज कार्यकर्त्यांसोबत चर्चा करणार आहोत. बंडखोरी केलेल्या पदाधिकाऱ्यांशीही चर्चा करणार आहोत, असं चंद्रशेखर बावनकुळे यांनी स्पष्ट केलं. बंडखोरी करत अपक्ष लढणारे आपले अर्ज मागे घेतील, असा विश्वास त्यांनी व्यक्त केला.

नववर्षाचं स्वागत देवदर्शनाने करून नवीन संकल्प करण्यासाठी देशभरातून लाखो भाविक शेगावात दाखल झाले आहेत. मंदिर रात्रभर भाविकांसाठी खुले ठेवण्यात आलं होतं. तरीही समाधीचं दर्शन घेण्यासाठी भाविकांना पाच ते सहा तास रांगेत उभं राहावं लागत आहे. शेगाव शहरात मोठ्या प्रमाणात देशभरातून आलेल्या भाविकांनी शेगाव शहराची वाहतूक सह पार्किंग व्यवस्था कोलमडली आहे. तर संत गजानन महाराज संस्थानाची पार्किंगसुद्धा फुल झाली आहे.

परळी वैद्यनाथ इथल्या बारा ज्योतिर्लिंगांपैकी पाचव्या क्रमांकाचं वैद्यनाथ ज्योतिर्लिंग मंदिर इथं नववर्ष 2026 च्या पहिल्या दिवशी भाविकांची मोठी गर्दी पाहायला मिळाली. महाराष्ट्रासह इतर अनेक राज्यांतून हजारो भाविक दर्शनासाठी परळीत दाखल झाले आहेत. नवीन वर्षाच्या पहिल्याच दिवशी पहाटे सकाळी पाच वाजल्यापासून भाविकांनी दर्शनासाठी लांबच लांब रांगा लावल्या आहेत.

छत्रपती संभाजीनगर भाजपा कार्यालयात उमेदवारी मिळाली नाही म्हणून नाराज झालेल्या भाजपच्या महिला कार्यकर्त्या दिव्या मराठे यांनी अन्नत्याग आंदोलन सुरू केलं होतं. दिव्या मराठे यांची भाजपचे नेते आणि मंत्री अतुल सावे, खासदार भागवत कराड आणि भाजपा जिल्हाध्यक्ष किशोर शितोळे यांनी भेट घेऊन अखेर नाराजी दूर केली.

4 तारखेला शिवसेना-मनसेचा वचननामा प्रसिद्ध होईल. ठाकरे बंधू एकत्रित वचननामा सादर करणार आहेत. कृपाशंकर सिंह हा भाजपचा बोलका पोपट आहे. मराठी महापौर होऊ द्यायचा नाही, हा भाजपचा अजेंडा आहे, अशी टीका संजय राऊतांनी केली.

राज्यात संविधानाचा भंग करण्याचं काम सुरू आहे. राज आणि उद्धव ठाकरेंच्या संयुक्त सभा होणार आहेत. ठाकरे बंधू वचननामा एकत्रित सादर करणार आहेत. मीरा-भाईंदर ठाण्यात एकत्र सभा होतील, असं राऊतांनी सांगितलं.

विधानसभा अध्यक्ष असल्याचा राहुल नार्वेकरांना विसर पडला आहे. राहुल नार्वेकरांकडून दमदाटी होते, हे सत्य आहे. राहुल नार्वेकर हे विधानसभा अध्यक्ष आहेत. त्यांनी निष्पक्ष असावं, असं संजय राऊत म्हणाले आहेत.

नितीन गडकरींच्या माजी स्वीय सहाय्यकांच्या मुलाने बंडखोरी केली आहे. फॉरवर्ड ब्लॉकची उमेदवारी घेऊन निनाद दीक्षित निवडणूक रिंगणात उतरले आहेत.

भाजपासह अनेक पक्षांमध्ये कार्यकर्त्ये नाराज झाल्याचे बघायला मिळतंय. पक्षाचे काम करूनही तिकीट न मिळाल्याने कार्यकर्त्यांमध्ये नाराजी आहे. छत्रपती संभाजीनगरमध्ये मोठ्या प्रमाणात भाजपाचे कार्यकर्ते नाराज झाले आहे.

पुणे पिंपरी चिंचवड मध्ये शिंदे शिवसेना व राष्ट्रवादी एकत्रित लढणार त्याबाबत आज उदय सामंत यांच्याशी चर्चा करणार. आज मी अभिवादन करण्यासाठी या ठिकाणी आलो आहे प्रशासनाने जोरदार तयारी केली आहे. थंडी खूप आहे. सर्व निधी या ठिकाणी देण्यात आलेला आहे सूचना जे आहे ते देण्यात आलेले आहेत. चांगल्या प्रकारची व्यवस्था या ठिकाणी केली आहे.

प्रभाग क्रमांक 15 ब अणि ड या दोन्ही प्रभागामध्ये भाजपच्या अधिकृत उमेदवारांच्या अर्जावर हरकती घेण्यात आल्या होत्या. तर सुनावणी होऊन निकाल तब्बल सात ते आठ तासांनी देण्यात आला. मात्र सर्वच अर्ज वैद्य ठरवण्यात आले… भाजपचे उमेदवार दत्ता गाडळकर यांच्यावर अपक्ष उमेदवार आदेश जाधव यांनी संपत्तीवरून हरकत घेतली होती.

बीडचे खासदार बजरंग सोनवणे यांच्याशी संबंधित हा साखर कारखाना आहे. उसाची पहिली उचल 3 हजार रुपये आणि 3500 रुपये भाव द्या या मागणीसाठी कारखाना बंद पाडला. उसाच्या गव्हाणीत उड्या मारत हा कारखाना बंद पाडला. कारखाना प्रशासनाकडून आंदोलकांशी चर्चा सुरु आहे

नवीन वर्षाच्या पहिल्या दिवशी अक्कलकोट नगरी भक्तांनी फुलून गेली. दरवर्षी नवीन वर्षाच्या सुरुवातीला हजारो भाविक अक्कलकोटमध्ये स्वामींच्या दर्शनासाठी येतात. सरत्या वर्षाला निरोप देत नवीन वर्षाची सुरुवात ही स्वामींच्या दर्शनाने करण्यासाठी दरवर्षी हजारोच्या संख्येने स्वामींभक्त अक्कलकोटला येतात. यंदाच्या वर्षी देखील तशीच गर्दी अक्कलकोटमध्ये पाहायला मिळतेय

अमरावती महानगरपालिका निवडणुकीत अनेक उमेदवारांना मोठा धक्का बसला आहे.  6 झोनमधील तब्बल 11 उमेदवारांचे नामांकन अर्ज अवैध, जात वैधता प्रमाणपत्र न जोडल्याने कारवाई करण्यात आली आहे.  अनामत रक्कम न भरल्याने अनेक अर्ज बाद झाले आहेत. भाजपसह विविध पक्षांना फटका बसला आहे.

कोल्हापूरमध्ये इनोव्हा कारने उडवल्याने तिघांचा मृत्यू झाला आहे. पुणे-बंगळुरू महामार्गावरील तावडे हॉटेल परिसरात हा भयानक अपघात झाला असून मृत्यूमुखी पडलेल्या तिघांची ओळख पटवण्याचं काम सुरू आहे.

सातारा : 31 डिसेंबर निमित्त पार्टीसाठी गेलेला युवक कास पठाराकडे 400 फूट दरीत कोसळला. आदित्य कांबळे असे जखमी युवकाचे नाव आहे.  छत्रपती शिवेंद्रराजे ट्रेकर्सच्या मदतीने युवकाला डोंगराच्या खालील बाजूस असणाऱ्या महादरे जंगलातून त्याला रेस्क्यू करण्यात आलं.  या घटनेत युवक गंभीर जखमी झाला असून  जिल्हा शासकीय रुग्णालयात त्याच्यावर उपचार सुरू आहेत.

शिरूर तालुक्यातील पिंपरी दुमाला येथे मध्यरात्री बिबट्याने थेट घराच्या अंगणात प्रवेश केल्याची धक्कादायक घटना घडली. श्वानाच्या शोधात असलेला बिबट्या अंगणात शिरताच घरातील धाडसी श्वानांनी त्याच्यावर भुंकत पाठलाग केला, त्यामुळे बिबट्याला पळ काढावा लागला. यामुळे चांगलीच खळबळ माजली असून नागरिक दहशतीखाली आहेत.

आजपासून 2026 या नवीन वर्षाची सुरुवात होत असून, वर्षाची पहिलीच सकाळ देवीच्या दर्शनाने पावन करण्यासाठी  तुळजापूर येथील तुळजाभवानी देवीच्या मंदिरात आज पहाटेपासूनच भाविकांची मोठी गर्दी पाहायला मिळत आहे.  राज्याच्या कानाकोपऱ्यातूनच नव्हे तर परराज्यातूनही भाविक तुळजापूरकडे दाखल झाले आहेत.

नवीन वर्षाची सुरुवात देवदर्शनाने करण्यासाठी विदर्भाची पंढरी म्हणून ओळख असलेल्या संत शेगाव स्थित गजानन महाराजांच्या मंदिरात भाविकांची मोठी मांदियाळी पाहायला मिळत आहे.  रात्रभरापासून भाविकांना गजानन महाराजांच्या दर्शनाचा लाभ घेता येत आहे. मंदिरात होणाऱ्या गर्दीचा अंदाज घेता रात्रभर मंदिर दर्शनासाठी खुलं ठेवण्यात आलं होतं. दूरवरून येणाऱ्या भाविकांची गैरसोय होऊ नये म्हणून मंदिर प्रशासनाकडून विशेष अशी खबरदारी घेतली जात आहे.