एकनाथ खडसे भ्रष्टाचारी, त्यांना आमदार करू नका; दमानिया यांचं राज्यपालांना साकडं

मुंबई : सामाजिक कार्यकर्त्या अंजली दमानिया आणि राष्ट्रवादी नेते एकनाथ खडसे यांच्यातील वाद संपण्याची चिन्हं नाहीत. एकनाथ खडसेंविरोधात अंजली दमानिया यांनी आता थेट राज्यपालांकडे धाव घेतली असून खडसेंना राज्यपाल नियुक्त आमदार करु नये, अशी मागणी त्यांनी केली आहे. त्यांनतर दमानिया यांच्या या मागणीमुळे खडसेंच्या संभाव्य आमदारकीवर गंडातर येतं की काय? अशा चर्चा राजकीय गोटात सुरु झाल्या आहेत. (Eknath Khadse is corrupt don’t make him MLA demands Anjali Damania)

खडसेंनी त्यांच्या वाढदिवसाच्या दिवशी आपल्याबाबत वादग्रस्त वक्तव्य केल्याचा आरोप अंजली दमानिया यांनी केलेला आहे. याप्रकरणी वाकोला पोलीस ठाण्यात दमानिया यांनी तक्रारदेखील दाखल केली आहे.

भाजपला सोडचिठ्ठी दिल्यानंतर एकनाथ खडसे यांनी राष्ट्रवादीत प्रवेश केला. त्यानंतर खडसेंची राष्ट्रवादीतर्फे राज्यपाल नामनिर्देशित आमदार म्हणून विधान परिषदेवर वर्णी लागण्याची जोरदार चर्चा आहे. त्यांचे नाव आमदारकीसाठी जवळजवळ निश्चित मानले जात आहे. अशातच अंजली दमानिया यांनी खडसेंना राज्यपाल नियुक्त आमदार करु नये; असे निवेदन राज्यपाल भगतसिंह कोश्यारी यांना दिलं आहे. दमानिया यांनी खडसेंवर पुन्ह एकदा गंभीर आरोप केले आहेत. ‘खडसेंवर भ्रष्टाचाराचे आरोप आहेत. त्यांनी राष्ट्रवादीत प्रवेश करताना वापरलेली भाषा या सर्व गोष्टींमुळे त्यांना आमदार करु नये’ अशी मागणी त्यांनी राज्यपालांकडे केली आहे.

खडसेंच्या वादग्रस्त विधानाबाबत शरद पवारांना फोन केला; पण…

यावेळी माध्यमांशी बोलताना अंजली दमानिया यांनी अनेक खळबळजनक दावे केले आहेत. ‘राष्ट्रवादीत प्रवेश करताना खडसेंनी माझ्याबद्दल वादग्रस्त वक्तव्य केलं. त्यानंतर मी स्वत: राष्ट्रवादीचे अध्यक्ष शरद पवार यांना फोन करून त्यांच्याकडे खडसेंबाबतची तक्रार केली होती. पण पवारांनी खडसे यांना वाचवण्याचा प्रयत्न केला’, असा दावा दमानिया यांनी केला आहे. तसेच, एकनाथ खडसे यांनी वृत्तवाहीन्यांसमोर माझी बदनामी केली. खडसेंविरोधात वाकोला पोलीस ठाण्यात तक्रार केली. मात्र, त्यावर काहीच कारवाई केली गेली नाही; असा आरोपही त्यांनी केला आहे. दरम्यान, राज्यपाल भगतसिंह कोश्यारी यांना सर्व पुरावे दिले असून अधिकचे पुरावेही लवकरच देणार आहे. तसेच, न्यायलयीन लढाई देखील सुरच ठेवणार असल्याचं त्यांनी स्पष्ट केलं.

संबंधित बातम्या :

खडसेंनी माझा सर्वाधिक छळ केला, माझं नाव घ्याल तर याद राखा, सोडणार नाही; दमानिया यांचा इशारा

खडसेंच्या अ‍ॅक्शनमुळे राष्ट्रवादीची चांदी, हळूहळू ‘असा’ लागेल भाजपच्या गडाला सुरूंग

…तर टीआरपी घोटाळा सीबीआयकडे गेला असता; अनिल देशमुख यांचा दावा

(Eknath Khadse is corrupt don’t make him MLA demands Anjali Damania)