ऐन गणेशोत्सवाच्या धामधुमीत एसटीच्या 500 हून अधिक बसेस सरकारी प्रचाराला, चाकरमान्यांचे हाल

सरकारी उपक्रम असलेल्या एसटी महामंडळाला सरकार अर्थपुरवठा करून उभारी देत आहे. परंतू एसटी महामंडळाचे मुख्य काम प्रवासी सेवा करण्याचे असताना आता सरकारी प्रचार यंत्रणेसाठी तिला दावणीला बांधण्याची नवी प्रथा रुढ झाली आहे. जळगावातील ‘लाडली दीदी’ उपक्रमानंतर उद्या सोमवारी 2 सप्टेंबर रोजी कोल्हापुराच्या वारणानगरात राष्ट्रपतीच्या उपस्थितीत होणाऱ्या महिला मेळाव्याला तब्बल अडीचशे ते पाचशेहून अधिक बसेसची मागणी सरकारने एसटी महामंडळाला केली आहे. त्यामुळे कोकणात गणेशोत्सवासाठी लागणाऱ्या गाड्या अपुऱ्या पडणार असल्याचे म्हटले जात आहे.

राष्ट्रपती द्रौपदी मुर्मू यांच्या कोल्हापूरच्या वारणानगर‌ येथे होणाऱ्या उद्याच्या महिलांच्या मेळाव्यासाठी एसटी महामंडळाकडे तब्बल 228 बसेसची मागणी सरकारने केलेली आहे. या बसेस 44 आसनी आणि मोठ्या आकाराच्या असून या बसेस महिला मेळाव्याच्या कार्यक्रमासाठी पुरविण्यात येणार आहेत.  उद्याच्या  02 सप्टेंबरच्या माननीय राष्ट्रपतींच्या वारणा नगरातील शिवनेरी क्रीडागण येथे होणाऱ्या कार्यक्रमास सुमारे 50 हजार महिला उपस्थित रहाणार आहेत. यामुळे कोल्हापूर आणि सांगली आगारात प्रवाशांना गैरसोय होण्याची शक्यता आहे.

कोल्हापूर, सांगली येथील प्रवाशांना सोमवारी एसटी बसेस विना राहावे लागणार आहे. त्यामुळे शाळेत जाणाऱ्या मुलांसह अनेकांचा आठवड्याच्या पहिला दिवस खाजगी वाहतूकीवर विसंबावे लागणार आहे. आगारांनी स्वतःच्या ताफ्यातील बसेस वारणानगर आणि परिसरात पाठवायच्या आहेत. तसेच इचलकरंजी आणि मलकापूर आगारांच्या मदतीसाठी सांगली विभागाच्या 50 बसेस मागविल्या आहेत. त्यामुळे कोकणातील गणपती सणासाठीचे नियोजन बिघडणार आहे. कोकणात गाड्याची गणेशोत्सवासाठी मोठी मागणी असल्याचे एसटी कर्मचारी कॉंग्रेसचे सरचिटणीस श्रीरंग बरगे यांनी म्हटले आहे.

येथे पाहा सरकारने एसटीकडे मागविलेल्या बसेसचा आगारनिहाय तक्ता

आपल्या आगाराच्या बसेस दि.2 सप्टेंबर 2024 रोजी सकाळी ठरलेल्या वेळेत कार्यक्रमाच्या ठिकाणी पोहचतील याची दक्षता घेण्यात यावी असेही या परिपत्रकात म्हटले आहे. आगार व्यवस्थापक राज्य परिवहन इचलकरंजी यांनी सांगली आणि मिरज आगार व्यवस्थापकांशी संपर्क साधून बसेस नियोजित ठिकाणी पोहचल्याची खात्री करावी असेही पत्रकात नमूद केले आहे, मलकापूर आगार व्यवस्थापकांनी इस्लामपूर आणि शिराळा आगार व्यवस्थापकांशी संपर्क करुन या बसेस नियोजित ठिकाणी पोहचल्याची खातरजमा करावी असे पत्रकात म्हटले आहे.

सरकारच्या परिपत्रकात एसटी महामंडळाच्या आगारांना दिलेल्या सूचना्

• कार्यक्रमासाठी वापरण्यात येणा-या बसेस 44 आसन क्षमतेच्या असाव्यात.
• बसेस स्वच्छ आणि सुस्थितीतीलच बसेस पाठविण्यात, कोणतीही बस वाटेत बिघडणार नाही याची खास दक्षता घेण्यात यावी.
• या बसेस सोबत दोन लॉगशीट देण्यात यावीत.
• आगार कार्यकक्षेतून सुटणा-या बसेस कार्यक्रमाच्या पार्कींग ठिकाणीच बसेस पार्कींग करण्याच्या सुचना संबंधीत चालकांना देण्यात याव्यात असेही या परिपत्रकात नमूद केले आहे.