ना बावनकुळे, ना एकनाथ शिंदे, नाथाभाऊंनी सांगितले नाव तिसरेच… ही व्यक्ती मुख्यमंत्री पदाच्या शर्यतीत…म्हणाले त्यांना फडणवीसांचा आशीर्वाद

किशोर पाटील, प्रतिनिधी, टीव्ही ९ मराठी: एकनाथ खडसे यांच्या दिल्लीवरीने भाजपमध्ये अनेक चर्चा झडत आहेत. भाजपमधून राष्ट्रवादी आणि पुन्हा भाजपमध्ये जाण्याची त्यांची इच्छा पाहता येत्या काही दिवसात मोठा बदल दिसू शकतो. खडसे यांनी गेल्यावर्षी सुद्धा भाजपच्या शीर्ष नेत्यांची भेट घेतली होती. त्यांच्या घरवापसीच्या चर्चा रंगल्या होत्या. आता ताज्या भेटीने या चर्चांना पुन्हा हवा मिळाली. या भेटीवर खडसे यांनी जाहीर वक्तव्य केले. त्याचवेळी मंत्री गिरीश महाजन यांना चिमटा काढायला ते विसरले नाहीत. महाजन हे मुख्यमंत्री पदाच्या शर्यतीत असल्याचा दावा नाथाभाऊंनी केला. कालच संजय राऊत यांनी मुख्यमंत्री पदासाठी चंद्रशेखर बावनकुळेंचे (Ekanth Khadse on Devendra Fadnavis) नाव पुढे केले होते. बच्चू कडूंनी एकनाथ शिंदे हेच पुढचे मुख्यमंत्री असे सूतोवाच केले होते. तर नाथाभाऊंनी मुख्यमंत्री पदाच्या शर्यतीत महाजनांनी समोर आणत या पदासाठी अजून एक दावेदार असल्याचा दावा केला आहे.

मुख्यमंत्री पदाच्या शर्यतीत तिसरा चेहरा

मुख्यमंत्री पदाची अचानक चर्चा सुरू झाली आहे. देवेंद्र फडणवीस हे दिल्लीत जाणार असल्याचा दावा उद्धव ठाकरे सेनेकडून वारंवार करण्यात येत आहे. फडणवीस हे पंतप्रधानाचा चेहरा असतील असा त्यांचा दावा आहे. फडणवीस यांच्यानंतर राज्यात चंद्रशेखर बावनकुळे हे मुख्यमंत्री होतील असे वक्तव्य काल खासदार संजय राऊत यांनी केले होते. त्यांनी महाजन हे मुख्यमंत्री होऊ शकणार नाही असेही म्हटले होते. तर आमदार बच्चू कडू यांनी एकनाथ शिंदे हे मुख्यमंत्री म्हणून राज्याची धूरा सांभाळतील असे म्हटले होते.

शहांनी दिल्लीला बोलावलं

“मी स्वतःहून दिल्लीला गेलो नाही. अमित शाह यांनी मला दिल्लीत बोलावले. काय काम आहे हे मला माहिती नव्हतं. गेलो तेव्हा त्यांनी मला भाजपमध्ये येण्यास सांगितले. त्यानंतर नड्डा यांच्याकडे पाठवले. मला भाजप प्रवेशात इंटरेस्ट नाही. मी शरद पवार यांच्यासोबत राहणार आहे आणि भविष्यातही त्यांच्यासोबत राहील. भाजप प्रवेशासाठी माझे काही कार्यकर्ते इच्छुक आहेत हे मी अमान्य करणार नाही.” अशी प्रतिक्रिया खडसे यांनी दिली.

गिरीश महाजन मुख्यमंत्री पदाच्या शर्यतीत

तर गिरीश महाजन हे मुख्यमंत्री पदाच्या शर्यतीत आहेत, त्यांच्या मतदारसंघात तशा आशयाचे बोर्डही लागलेले होते असा दावा नाथाभाऊंनी केला. एवढ्या लहान माणसासोबत मी संघर्ष करतोय असा टोलाही त्यांनी लगावला. गिरीश महाजन यांना मंत्री होईपर्यंत सर्वतोपरी मदत केली. माझ्या सभेशिवाय त्यांच्या मतदारसंघात निवडणुकीची सांगता होत नव्हती. असा दावाही खडसे यांनी केला.