Devendra Fadnavis : पोलिसांच्या वाहनातून निवडणुकीसाठी रसद? शरद पवारांच्या आरोपानंतर देवेंद्र फडणवीस मैदानात; असा केला पलटवार
Devendra Fadnavis attack on Sharad pawar : विधानसभा निवडणुकीच्या राजकारणात लोकसभेतील मुद्दा विरोधकांनी आता पु्न्हा उचलून धरला आहे. पोलीसांच्या वाहनातून निवडणुकीसाठी रसद पुरवण्यात येत असल्याचा गंभीर आरोप शरद पवार यांनी केला आहे. त्यावर आता उपमुख्यमंत्री देवेंद्र फडणवीस यांनी जोरदार प्रतिक्रिया दिली आहे.
विधानसभा निवडणुकीत आरोप-प्रत्यारोपांच्या फैरी झडत आहे. लोकसभा निवडणुकीतील मतदारांना पैशा वाटप करण्यासाठी सरकारी यंत्रणेचा वापर होत असल्याचा मुद्दा विरोधकांनी विधानसभेच्या निवडणुकीतही उचलून धरला आहे. यापूर्वी संजय राऊत यांनी मुख्यमंत्र्यांच्या हेलिकॉप्टरमधून रसद पुरवल्याचा आरोप लोकसभा निवडणुकीदरम्यान केला होता. पोलीसांच्या वाहनातून निवडणुकीसाठी रसद पुरवण्यात येत असल्याचा गंभीर आरोप शरद पवार यांनी केला आहे. त्यावर आता उपमुख्यमंत्री देवेंद्र फडणवीस यांनी जोरदार प्रतिक्रिया दिली आहे.
काय म्हणाले फडणवीस
शरद पवार यांच्या या गंभीर आरोपानंतर आता उपमुख्यमंत्री देवेंद्र फडणवीस रिंगणात उतरले आहेत. शरद पवार यांच्या काळात असं चालायचं, आता त्यांना तसा भास होत असेल. आमच्या काळात तर असं काही होत नाही, असा पलटवार फडणवीस यांनी त्यांच्यावर केला आहे. त्यामुळे विधानसभा निवडणुकीच्या तोंडावर रसद कुणाची कोंडी करणार आणि कुणाचे बिंग फुटणार हे लवकरच समोर येईल.
शरद पवारांचा आरोप काय?
नाशिक येथील उमेदवारांसाठी हेलिकॉप्टरने एबी फॉर्म पाठवल्याप्रकरणात शिवसेना शिंदे गटावर महाविकास आघाडी तुटून पडली आहे. संजय राऊत यांनी तोंडसूख घेतल्यानंतर राष्ट्रवादी काँग्रेस शरदचंद्र पक्षाचे नेते शरद पवार यांनी आज महायुतीवर गंभीर आरोप केला. या सरकारचं वैशिष्ट्ये आहे. विमानाने एबी फॉर्म पाठवले जातात. तर पोलीस दलाच्या गाड्यातून महायुतीच्या उमेदवारांना रसद पुरवली जात आहे, असा गंभीर आरोप शरद पवार यांनी केला. त्यानंतर राज्याच्या राजकारणात एकच खळबळ उडाली आहे.
जाहीरपणे सांगितले असते पण…
मी गोष्ट जाहीरपणे सांगणार होते, असे शरद पवार म्हणाले. पण माहिती देणाऱ्या अधिकाऱ्यांनी त्यांचे नाव जाहीर करू नये अशी गळ घातल्याचा दावा पवार यांनी केला. बारामतीमध्ये पाडव्यानिमित्त आयोजित स्नेहमिलन कार्यक्रमात त्यांनी सत्ताधाऱ्यांवर हा बॉम्ब टाकला. यापूर्वी लोकसभा निवडणुकीत मुख्यमंत्र्यांच्या हेलिकॉप्टरमधून अधिकाऱ्यांनी पैशांची रसद पुरवल्याचा आरोप संजय राऊत यांनी केला होता. त्यावेळी पण एकच खळबळ उडाली होती. आता या मुद्दावरून राजकारण तापण्याची चिन्हं आहेत.
