खातेवाटपात मोठे फेरबदल, शिंदे मंत्रिमंडळात आता कुणाला कोणतं मंत्रीपद?

महाराष्ट्र सरकारकडून अखेर खातेवाटप जाहीर करण्यात आलं आहे. या खातेवाटपात नवनियुक्त मंत्र्यांना काही खात्यांची जबाबदारी देण्यात आली आहे. पण हे खातेवाटप करत असताना सध्याच्या मंत्र्यांच्या खात्यांमध्ये देखील काही फेरबदल करण्यात आल्याची माहिती समोर आली आहे.

Chetan Patil | Updated on: Jul 14, 2023 | 5:44 PM

मुंबई : महाराष्ट्र सरकारकडून अखेर खातेवाटप जाहीर करण्यात आलं आहे. या खातेवाटपात नवनियुक्त मंत्र्यांना काही खात्यांची जबाबदारी देण्यात आली आहे. पण हे खातेवाटप करत असताना सध्याच्या मंत्र्यांच्या खात्यांमध्ये देखील काही फेरबदल करण्यात आल्याची माहिती समोर आली आहे. मुख्यमंत्री एकनाथ शिंदे यांनी याबाबतचे अंतिम निर्णय घेण्यात आले आहेत. तसेच महाराष्ट्र सरकारमधील प्रत्येक मंत्र्याकडे कोणतं खातं आहे, याबाबतची माहिती मुख्यमंत्री कार्यालायकडून प्रसिद्ध करण्यात आली आहे. विशेष म्हणजे महाराष्ट्राचे राज्यपाल रमेश बैस यांनी मंजुरी दिल्यानंतर हे खातेवाटप जाहीर करण्यात आलं आहे.

नव्या खातेवाटपानुसार, मुख्यमंत्री एकनाथ शिंदे यांच्याकडे सामान्य प्रशासन, नगर विकास, माहिती व तंत्रज्ञान, माहिती व जनसंपर्क, परिवहन, सामाजिक न्याय, पर्यावरण व वातावरणीय बदल, खनिकर्म आणि इतर कोणत्याही मंत्र्यांना वाटप न केलेले विभाग असणार आहेत.तर उपमुख्यमंत्री देवेंद्र फडणवीस यांच्याकडे गृह, विधी व न्याय, जलसंपदा व लाभक्षेत्र विकास, ऊर्जा, राजशिष्टाचार ही खाती असतील. तर उपमुख्यमंत्री अजित पवार यांच्याकडे वित्त व नियोजन हे खाते राहील.