Find Your Polling Booth Maharashtra : मतदानाला जाताय? मतदार यादीत असे तपासा नाव, एका क्लिकवर जाणून घ्या…
Municipal Corporation Election 2026 Polling Booth: आज मुंबईसह राज्यातील 29 महानगरपालिकेत मतदान सुरू आहे. 18 वर्षांवरील मतदारांना लोकशाहीच्या महोत्सवात सहभागी होता येईल. तुमचे नाव मतदार यादीत असे तपासा...तुमचे मतदान केंद्र कुठंय हे एका क्लिकवर जाणून घ्या...
BMC Election 2026 Voter List: मुंबईसह राज्यातील 29 महानगरपालिकांसाठी आज मतदान सुरू आहे. मुंबईतील 227 जागांसाठी चुरशीचा सामाना रंगणार आहे. या निवडणुकीत ठाकरे बंधू,भाजप-शिंदेसेना, काँग्रेस-वंचित बहुजन आघाडी आणि इतर पक्ष असा सामना दिसेल. लोकशाहीच्या या महोत्सवात तुम्हालाही भाग घेता येईल. मतदान करता येईल. त्यासाठी तुमचे वय 18 वर्षे वा त्यापेक्षा अधिक हवे. मतदानासाठी तुम्ही त्या त्या महापालिका क्षेत्रातील रहिवाशी हवेत. तुमचे नाव तिथल्या मतदार यादीत असणे आवश्यक आहे. बीएमसी निवडणूक एकाच टप्प्यात होईल. या निवडणुकीत एक कोटींहून अधिक मतदार मतदानाचा हक्क बजावतील. मतदार यादीत तुमचे नाव आहे की नाही, हे एका क्लिकवर माहिती करा.
सर्वात श्रीमंत महापालिका
मुंबई महानगरपालिकेसाठी 227 जागा आहेत. यासाठी 1,700 उमेदवार निवडणुकीच्या रिंगणात आहेत. यामध्ये 879 महिला आणि 821 पुरुष उमेदवार आहेत. बृहन्मुंबई महानगरापालिका ही देशातील सर्वात मोठी आणि सर्वात श्रीमंत महापालिका आहे. पीटीआयनुसार, 2026 मधील निवडणुकीत उमेदवारांची संख्या फेब्रुवारी 2017 च्या तुलनेत 25.27 टक्क्यांपेक्षा कमी आहे. 2017 मध्ये एकूण 2,275 इतके उमेदवार होते. त्यावेळी महापालिकेच्या रिंगणात 1,190 पुरुष आणि 1,084 महिला होत्या. तर एक तृतीयपंथी उमेदवार निवडणूक मैदानात होता.
मतदार यादीत असे तपासा तुमचे नाव
महाराष्ट्रातील महानगरपालिका निवडणुकीच्या मतदार यादीत तुमचे नाव कसे तपासणार? असा सवाल तुम्हाला पडला असेल तर हे नाव सहजरित्या तु्म्हाला तपासता येईल. महाराष्ट्र राज्य निवडणूक आयोगाच्या mahasecvoterlist.in वर जाऊन तुमचे नाव, EPIC नंबर टाकून तुमचे नाव तपासू सकता. याशिवाय तुम्ही राष्ट्रीय मतदाता सेवा पोर्टलची (NSVP) साईट voters.eci.gov.in वर जाऊन तुम्ही मतदार यादीत तुमचे नाव शोधू शकता. हा पर्याय निवडल्यावर तुमचे नाव EPIC क्रमांकाआधारे पाहु शकता.
मतदार हेल्पलाईन ॲप असे करा डाऊनलोड
निवडणूक आयोगाचे मतदार हेल्पलाईन ॲप आहे. हे ॲप तुम्ही eci.gov.in वरून डाऊनलोड करू शकता. या ॲपवर तुम्ही तुमचे नाव सहज पाहू शकता. तुमचे नाव, मतदार यादीत नोंदवल्यावर मतदान करतेवेळी आधार कार्ड, पॅन कार्ड वा पासपोर्ट सारखे कागदपत्रे अथवा ओळखपत्र दाखवून मतदान करता येईल.
राज्यात 15,931 उमेदवार मैदानात
राज्यातील 29 महानगरपालिकांच्या निवडणुकीसाठी एकूण 2,869 जागा आहेत. या जागांसाठी 15,931 उमेदवार निवडणुकीच्या रिंगणात उतरलेले आहेत. मुंबई महानगरपालिकेत सर्वाधिक उमेदवार आहेत. तर नव्याने महापालिका झालेल्या इचलकरंजी आणि जालन्यात पहिल्यांदाच ऐतिहासिक मतदान होणार होणार आहे. मुंबईत 227 जागांसाठी 1,700 उमेदवार, पुण्यात 165 जागांसाठी 1,166 उमेदवार निवडणुकीच्या रिंगणात आहेत. उपराजधानी नागपूरमध्ये 151 जागांसाठी 993 उमेदवार फडात आहे. छत्रपती संभाजीनगरमध्ये 115 जागांसाठी 859 उमेदवार नशीब आजमावत आहेत.
