Municipal Corporation Election 2025 : राज्यात महापालिका निवडणुका जाहीर, ओबीसींसाठी किती जागा?
आज निवडणूक आयोगाची महत्त्वाची पत्रकार परिषद पार पडली, या पत्रकार परिषदेमध्ये महापालिका निवडणुकीची घोषणा करण्यात आली आहे. येत्या 15 जानेवारी 2025 रोजी या निवडणुकीसाठी मतदान होणार आहे.
राज्यात महापालिका निवडणुका कधी होणार? याकडे सर्वांचं लक्ष लागलं होतं. अखेर आज महापालिका निवडणुकीच्या पार्श्वभूमीवर निवडणूक आयोगाची महत्त्वाची पत्रकार परिषद पार पडली आहे. या पत्रकार परिषदमध्ये महापालिका निवडणुकीच्या कार्यक्रमाची घोषणा करण्यात आली आहे. निवडणूक आयोगानं जाहीर केलेल्या निवडणूक कार्यक्रमानुसार येत्या 15 जानेवारी 2026 रोजी महापालिका निवडणुकीसाठी मतदान होणार आहे, तर 16 जानेवारी 2026 रोजी मतमोजणी होणार आहे. राज्यातील एकूण 29 महापालिकांचा यामध्ये समावेश असून, एकूण 2869 जांगासाठी ही निवडणूक असणार आहे. आजपासून या महापालिका क्षेत्रांमध्ये आचारसंहिता लागू झाल्याची घोषणा निवडणूक आयोगाच्या वतीनं करण्यात आली आहे.
निवडणूक आयोगानं जाहीर केलेल्या निवडणूक कार्यक्रमानुसार 23 डिसेंबर ते 30 डिसेंबर या कालावधीमध्ये महापालिका निवडणुकीसाठी उमेदवारांना आपले उमेदवारी अर्ज दाखल करता येणार आहेत, तर 31 डिसेंबर रोजी उमेदवारांच्या अर्जाची छाननी होणार आहे. तर 2 जानेवारी 2026 पर्यंत उमेदवारांना आपले अर्ज मागे घेता येणार आहेत. 3 जानेवारी रोजी चिन्हाचं वाटप होणार आहे, तर 15 जानेवारी 2026 रोजी मतदान होणार आहे.
दरम्यान राज्यातील एकूण 29 महापालिकांसाठी निवडणूक आयोगानं आज निवडणूक कार्यक्रमाची घोषणा केली आहे, त्यानुसार 2869 जांगासाठी ही निवडणूक होणार आहे. 2869 जागांपैकी 1 हजार 442 जागा या महिलांसाठी राखीव आहेत, तर 341 जागा या एससीसाठी राखीव असून, एसटीसाठी 77 जागा राखीव आहेत. तर ओबीसींसाठी 759 जागा राखीव आहेत.
कोणत्या महापालिकांचा समावेश?
मुंबई, ठाणे, नवी मुंबई, उल्हासनगर, कल्याण डोंबिवली, भिवंडी निजामपूर, मिरा भाईंदर, वसई विरार, पनवेल, नाशिक, अहिल्यानगर, जळगाव, धुळे, मालेगाव, पुणे, पिंपरी चिंचवड, सोलापूर, कोल्हापूर, इचलकरंजी, सांगली-मिरज-कुपवाडा, छत्रपती संभाजीनगर, नांदेड-वाघाळा, परभणी, जालना, लातूर, अमरावती, अकोला, नागपूर आणि चंद्रपूर या ठिकाणी महापालिकांची निवडणूक होणार आहे.
दरम्यान उमेदवरांना आपले उमेदवारी अर्ज हे ऑफलाईन पद्धतीनेच भरावे लागणार आहेत, तसेच ज्यांचं दुबार मतदान आहे, त्यांच्या नावापुढे स्टार करण्यात आलं आहे, अशा नागरिकांना केवळ एकाच मतदान केंद्रावर मतदान करता येईल, असंही यावेळी निवडणूक आयोगाकडून स्पष्ट करण्यात आलं आहे.
