तुमचाही निळा शर्ट, तुमच्याकडे महिला आकर्षित होतील काय?; गुलाबी जॅकेटवरून शरद पवार यांचा अजितदादांना टोला

राज्याचे उपमुख्यमंत्री अजित पवार हे सध्या रोज गुलाबी जॅकेट घालत आहेत. गुलाबी रंग शुभ असल्याने विधानसभा निवडणुकीपर्यंत अजितदादा गुलाबी जॅकेट घालणार असल्याचं सांगितलं जात आहे. लाडकी बहीण योजना जाहीर केल्यानंतर अजित पवार यांनी हा निर्णय घेतला असल्याचं सांगितलं जात आहे. अजितदादांच्या या जॅकेटवरून माजी केंद्रीय मंत्री शरद पवार यांनी टोला लगावला आहे. तुम्ही निळा शर्ट घातला आहे. तुमच्याकडे महिला आकर्षित होणार आहे का?, असा खोचक टोला शरद पवार यांनी अजितदादा यांना नाव न घेता लावला.

शरद पवार हे पुण्यात मीडियाशी संवाद साधत होते. यावेळी त्यांना अजित पवार यांच्या गुलाबी जॅकेटबाबत विचारण्यात आलं. तुम्ही निळा शर्ट घातलाय. त्यामुळे तुमच्याकडे महिलांचं आकर्षण होणार आहे काय काय संबंध?; असा टोला शरद पवार यांनी लगावला.

मोदींना टोला

यावेळी शरद पवार यांनी पंतप्रधान नरेंद्र मोदी यांच्यावरही टीका केली. माझी इच्छा एकच आहे. विधानसभेची निवडणूक आली आहे. लोकसभा निवडणुकीच्या वेळी पंतप्रधानांनी 18 सभा घेतल्या होत्या. त्यातील 14 ठिकाणी आमचे उमेदवार निवडून आले. त्यांनी अधिक सभा घ्याव्यात. महाराष्ट्रातील जनतेला संबोधित करावं. म्हणजे आम्ही स्थिर सरकार आम्ही महाराष्ट्राला देऊ, असा चिमटा शरद पवार यांनी काढला.

मतभेद नाहीत

मुख्यमंत्रीपदाच्या चेहऱ्यावरून महाविकास आघाडीत मतभेद असल्याची चर्चा आहे. त्यावरही त्यांनी भाष्य केलं. आमच्यात कोणतेही मतभेद नाहीत. अजिबात म्हणजे अजिबात नाही. आम्ही कोणत्याही पदाची अपेक्षा केली नाही. मीही कोणत्या स्पर्धेत नाही, असं शरद पवार म्हणाले.

मला माहिती नाही

मराठा, कुणबी आणि ओबीसी या वादामुळे मतांची विभागणी होणार असल्याचं सांगितलं जात आहे. त्याबाबतही शरद पवार यांना विचारण्यात आलं. त्यावर माझ्याकडे काही आधार नाही. त्याबाबतची मला माहिती नाही, असं ते म्हणाले.

तीन वर्षानंतर का जाग आली?

माजी पोलीस आयुक्त परमबीर सिंग यांच्या आरोपावरही त्यांनी भाष्य केलं. त्यांनी अत्यंत बेजबाबदार वक्तव्य केलं आहे. त्यांचं वागणं, बोलणं पाहता सरकारने अॅक्शन घेतली पाहिजे. तीन वर्षानंतर त्यांना का जाग आली? ठिक आहे. निवृत्त अधिकारी आहेत. त्यांच्यावर बोलणं योग्य नाही. पुरावे द्यायचे तर द्या. आनंद आहे. त्यातून वेगळ्या गोष्टी बाहेर येतील, असं शरद पवार म्हणाले.

समितीचा निर्णय आल्यावर बोलू

वक्फ बोर्ड दुरुस्ती विधेयकावरही त्यांनी भाष्य केलं. या कायद्याचा ड्राफ्ट आता माझ्या हातात आला आहे. सुप्रिया सुळेंनी पार्लमेंट सूचवलं की, यावर लगेच निर्णय घेऊ नये. सर्व पक्षीय समिती नेमावी. तशी ती कमिटी नेमली. या समितीसाठी आम्ही दोन नावे दिली होती. त्यातील एक नाव घेतलं आहे. सहा महिन्यानंतर कमिटीचा अहवाल येईल. त्यानंतर आम्ही बोलू, असं त्यांनी स्पष्ट केलं.

अजून चार निर्णय घेतील

लाडकी बहीण योजनेवरही शरद पवार यांनी खोचक टीका केली. राज्यकर्त्यांनी निर्णय घेतला आहे. त्यामुळे नक्कीच काही विचार केला असेल. नक्कीच त्यांच्याकडे पुरेसे पैसे असतील. त्यातून करतील. सरकारडे बरीच शिल्लक रक्कम असेल. त्यामुळे ते अजून असे चार निर्णय घेतील, असा टोला त्यांनी लगावला.