मनोज जरांगे पाटलांच्या भेटीला सरकारचे शिष्टमंडळ येण्यापूर्वीच पोलिसांकडून थेट कारवाई, चार..

मराठा समाजाचे नेते मनोज जरांगे पाटील यांनी 30 मे 2026 पासून उपोषणाला बसण्याचा इशारा दिला. मराठा समाजाच्या मागण्याकरिता ते उपोषणाला बसत आहेत. काही दिवसांपूर्वीच मनोज जरांगे पाटील यांची भाजपा नेते प्रसाद लाड यांनी भेट घेतली. मनोज जरांगे यांच्यावर टीका केल्यानंतर ते भेटीला पोहोचले होते. तुमच्या मागण्या सरकारपर्यंत पोहोचवतो असे, त्यांनी त्यावेळी जरांगेंना म्हटले होते. मात्र, उद्याच्या उपोषणावर मनोज जरांगे पाटील ठाम आहेत. त्याच पार्श्वभूमीवर आज मनोज जरांगे पाटील यांना भेटण्याकरिता सरकारचे शिष्टमंडळ जात आहे. सर्वांच्या नजरा जालण्याकडे आहेत. सरकारचे शिष्टमंडळ मनोज जरांगे पाटील यांना भेटण्यापूर्वीच पोलिसांकडून मोठी कारवाई केली जात आहे. छत्रपती संभाजीनगरमध्ये खबरदारी म्हणून चार मराठा आंदोलकांना पोलिसांनी ताब्यात घेतले आहे.

सरकारचे शिष्टमंडळ व मनोज जरांगे पाटील यांच्या भेटीच्या पार्श्वभूमीवर छत्रपती संभाजीनगर पोलिसांची प्रतिबंधात्मक कारवाई केली. यापूर्वी छत्रपती संभाजीनगर दौऱ्यावर असताना आमदार प्रसाद लाड यांना धमकीचा फोन आल्याचे सांगण्यात आले होते. प्रसाद लाड पुन्हा छत्रपती संभाजीनगर दौऱ्यावर आल्यानंतर काळे झेंडे दाखवणार असा मराठा आंदोलकांनी इशारा दिला होता.

गणेश उगले, सतीश देवखळे, अंकुश सकुंडे व योगेश शेळके यांना पोलिसांनी ताब्यात घेतल्याची माहिती मिळत आहे. आज आमदार प्रसाद लाड आणि मंत्री राधाकृष्ण विखे पाटील मनोज जरांगे पाटील यांची भेट घेणार आहेत. यासोबतच प्रसाद लाड यांनी मनोज जरांगे पाटील यांच्या भेटीपूर्वी एक भावनिक पोस्टही सोशल मीडियावर शेअर केली.

मनोज जरांगे पाटील यांना भेटीसाठी येणाऱ्या शिष्टमंडळामध्ये उदय सामंत यांचा समावेश नाहीये. इतर दाैऱ्यावर असल्याने उदय सामंत हे अंतरवाली सराटीमध्ये येणार नाहीत. सरकारचे शिष्टमंडळ मनोज जरांगे पाटील यांच्या भेटीला येत असल्याने कटेकोठ बंदोबस्त ठेवण्यात आला. मनोज जरांगे पाटील यांनी उद्याचे उपोषण करू नये, याकरिता सरकारकडून प्रयत्न केली जात आहेत. प्रसाद लाड आणि विखे पाटील यांच्या प्रयत्नांना यश मिळते का? हे पाहण्यासारखे ठरेल.